___Cemil Oguz___

Careke din Bîenaleke tê û bi diruşma "Pisîka Sê Ling" gelek berheman pêşkêşî me dike. Bianel her bi heyecan in, ez bi xwe jê kêfê digirim. Û navendên (mekanên) wê ku berhemên lê têne pêşkêşkirin jî bi awayekî din balkêştir in.

Em qala 18'emîn Bîanela Stenbolê dikin. 20'ê mehê Bîenal dest pê dike û heta 23'yê sermaweza 2025'an dê li dar be. Tam bi temamî ji 30 welatan 47 hunermend berhemên xwe pêşkêş dikin. Bi ser 100'î re berhem hene.

Merasima destpêkê li bexçeyê Yêtîmxaneya Kevn a Fransiz ku taxa Tomtom a Beyogluya Stenbolê ye li dar ket. Dîtina ciheke wisa kevnare, dîrokî, bêhna wê atmosferê bi xwe hesteke cuda bû. Ji xwe yek ji taybetiya Bienala Stenbolê jî ev e ku çalakiyên xwe li cih û navendê wisa li dar dixe ku heta niha belkî gelek kesî ew der nedîtibin, kifş nekiribin. Ji bo min bi xwe jî wisa ye/bû. Bi vê û bi Bienalê heta niha li dar ketine re heta niha min gelek cihên wisa li Stenbolê kifş kirine û çûme hem ew cih dîtine, hem jî berhemên li van deran hatine peşkeş kirin.

JI 2025 HETA 2027'AN
Navenda Bienala îsal Xeta Beyoglu-Karakoy e, li van deran, li 8 navendan dê çalakî li dar bikevin. Bienala îsal li ser sê lingan berhem dane sazkirin; lingê yekem îsal, û her wiha di sala 2026 û 2027'an de jî bidome.

ÎKSV (Weqfa Çand û Hunerê ya Stenbolê) vê Bîenalê organîze dike; amadekaran diyar kir ku armanc ew e sala bê Akademiya Bîenala Stenbolê ava bikin.

NAVENDÊN BÎENALÊ; CIHÊN DÎROKÎ
Navendên ku çalakiyên Bienalê wê lê li dar bikevin cihên Dîrokî ne. Cihên balkêş û xweşik in. Va ne ew cih:

- DIBISTANA RÛMAN: Dibistana Rûman a Galata di sala 1885'an de hatiye avakirin û heta sala 1988'an ev der wekî saziya perwerdehiyê ya cemaeta ruman hatiye bikaranîn. Di sala 2012'yan de ji bo xebatên çand û hunerî hatiye veguherandin. Di sala 2019 û 2023'yan de restorastoyeke cidî lê hatiye kirin. Nolan Oswald Dennis, İpek Duben, Ali Eyal, Simone Fattal, Lou Fauroux, Lungiswa Gqunta, Kongkee, Seta Manoukian, Merve Mepa, Naomi Rincon-Gallardo, Ana Vaz, Akram Zaatari, Ayman Zedani wê berhemên xwe li vir pêşkêş bikin

- YÊTÎMXANEYA KEVN A FRANSIZ: Yêtîmxaneya Kevn a Fransiz li Taxa Tomtomê ye. Niha navê "Tophane Mekan" lê kirine. Ev yêtîmxane di sala 1869'an de hatibû avakirin û heta sala 1937'an ev der hem wekî yêtîmxane, hem wekî dibistana seretayî hatibû xebitandin. Berhemên hunermend Khalil Rabah wê li vê derê bêne pêşkêş kirin

- ELHAMRA HAN: Xana Elhamra li ser Kolana Îstîklalê ye. Belkî gelek kurd ji ber Pirtûkxaneya Medyayê vê derê dizanin lê belkî kêm kes ji van mêvanan çûne qatên jor ên vê xanê. Li qata diduyan a Xana Elmarayê di sala 1827'an de şanogeh hatiye avakirin. Bifikirin, nêzî 140 sal berê li vê derê dengê şanoyê bilind bûye, niha dengê berhemên hunerî wê bilind bibe. Niha wê berhemên hunermend  Natasha Tontey, Sevil Tunaboylu, Mona Benyamin, Şafak Şule Kemanci, Jagdeep Raina, Riar Rizaldi û Lara Saab li vir bêne pêşkêş kirin.

- MECLÎS-Î MEBÛSAN 35: Ev avahiya li ser Kolana Meclis-î Mebûsan e li nimreya 35'an de jêrxaneya wê tê bikaranîn. Wê berhemên hunermend  Eva Fàbregas, Pilar Quinteros, VASKOS (Vassilis Noulas & Kostas Tzimoulis) li vê derê bin.

Her wiha li cihên wekî "Kulah Fabrikasi", "Zihni Han" û "Galeri 77" jî berhemên Bienalê tene pêşkêşkirin.

Nota dawî: Hemû çalakiyên li Bîenalê bê pere dikarin bêne temaşekirin. Rojên duşemê ne têde, pêşangeh her roj di navbera saetên 10.00 - 18.00'an de vekirî ne.

Avahiya Yêtîmxaneya Kevn a Fransiz balê dikişîne.