Diyarname
Helbestvan Sebrî Vûral bi pirtûka xwe ya nû ya bi navê “Sola Qetiyayî”, careke din dilê xwendevanan bi helbestên xwe yên kûr û hestiyar şa dike. Pirtûka ji 96 rûpelan pêk hatî ji aliyê Weşanên Belkî ve hate çapkirin.
“Sola Qetiyayî” pirtûka sisêyan a helbestan Sebrî Vûral e. Helbestvan, dema behsa jiyan û helbestvaniya xwe dike, wiha dibêje: “Ez di sala 1968’an de li Dêrika Çiyayê Mazî ji dayik bûm. Jiyana min li ser axa welatekî birîndar dest pê kir ku xencerên hesûdî û neheqiyê dilê min diêşand. Min dibistana seretayî, navîn û lîseyê li Dêrikê xwend û di salên 1983-1984’an de li Eskişehirê zanîngeh qezenc kir. Di ciwaniyê de, helbest bûn ronahiya rêya min. Bi gotinên efsûnî yên helbestan, min dest bi rêwîtiyeke kûr a hest û ramanan kir. Bi taybetî, di sala 1990’î de, du rêzikên helbestên Melayê Cizîrî min hejand û bûn sedema nasîna min bi helbesta kurdî re. Paşê, bi xebatên Feqiyê Teyran, Baba Tahirê Hemedanî, Ehmedê Xanî û Cegerxwîn, hezkirina min a ji helbestê kûrtir bû. Wekî rêwîyekî di deryaya helbestê de, min bi keştiyeke çongfisyayî hestên birîndar û qêrînên axa welatê xwe vegot. Helbestên min di kovarên wekî Çirûsk, Heftreng, Dilop, Kund û Nûbiharê de cih girtine.”
Di helbestên xwe de, Vûral ne tenê eşq û evînê, lê her wiha xizanî, têkoşîn, bêwelatî, şer, civak, lehengî, xweza, hebûn û nebûn, derûnî û pîvanên kesayetiyê jî bi kûrahî vedikole. Bi zimanekî zelal û gotinên bi hêz, ew hestên xwe bi awayekî wisa dirêsîne ku dilê xwendevanan dihejîne. Yek ji helbestên wî yên dawî ku behsa cihê lê dijî dike, bi vî rengî ye:
“DÊRIK
Li qûntara çiyayê mazî gelawêj e, demsal
Bi awireke binevşî dinêre êvar
Mahşereke zindî dibeze li kolanê Dêrikê
Di deryaya xeman de diponije êrge baba
Reş girêdaye giyarê mancêl
Kulêbe bi keder bi ser birînan de diherike
Dahl û kaliko çavên wan ji girî bardibin
Zeytûn gulîkên xwe jêdikin
Tûrcel, ji dûr ve bi çavê girînokî li pêy rêwiyên bêxatirxwestin dinêherin
Îro
Hewareke lale hêvî
Herkes û bajar birîna xwe gez dike vê êvarê
Tu, dibî nalîna welatekî birîndar
û
kirasê xemên xwe li min dike dêrikkkk...”
Ev pirtûka nû ku bi zimanekî şêrîn û hestiyar, careke din nîşan dide ku bi “Sola Qetiyayî” re dixwaze xwe di nava şekalên helbesta kurdî de bi cih bike, bibe yek ji dengê herî bi bandor a helbesta kurdî û hebûna xwe bide diyar kirin.
Pirtûkên Sebrî Vûral ên hatine çapkirin:
- Bilûra Kerr (Helbest, Weşanên Belkî, 2015)
- Wesyetên Qefilî (Helbest, Weşanên Lîs, 2019)
- Sola Qetiyayî (Helbest, Weşanên Belkî, 2025)