Diyarname
Nivîskar Îbrahîm Kaya bi navê “Dengên Razayî” pirtûkeke çîrokan amade kir û pirtûk ji Weşanên Aramê derket.
“Dengên Razayî” ji 10 çîrokan pêk tê û navê pirtûkê jî ji çîrokek di pirtûkê de hatiye girtin. “Dengên Razayî”, “Şeva Qedrê”, “Kolanên Ker û Lal”, “Pirsên Bêbersiv”, “Dêra Perîxanê”, “Berfa Sor”, “Tabut”, “Zarokên Sêwî”, “Jina Berxwedêr” û “Xecê” çîrokên di pirtûkê de ne. Edîtoriya pirtûkê nivîskarê Diyarnameyê Hogir Berbir kiriye.
Çîrokên di ‘Dengen Razayî’ de neynika serdemekê ne. Ev pirtûk çîrok ne tenê pirtûkek çîrokan e, di heman demê de şahidîtiya pêvajoyekê nîşanî xwendevanan dide..

Îbrahîm Kaya kî ye?
Nivîskar Îbrahîm Kaya di sala 1984’an de li navçeya Dêrika Çiyayê Mazî ya Mêrdînê hatiye dinê. Dibistana seretayî û navîn li Mêrdînê, lîse jî li Amedê xwendiye. Ji ber xebatên xwe yên siyasî mecbûr ma xwendina dibistanê terk bike. Kaya di 2009’an de li Cîzîrî hat girtin û 28 sal cezayê hepsê lê birîn.
Heta niha ew li girtîgehên Amed, Osmaniye, Kandira û yên din maye û hê jî di girtîgehê de ye. Kaya li girtîgehan dest bi nivîsandina helbest û çîrokan kiriye, giraniya xebatên xwe li ser van hêmanan dimeşîne. Ew bi çîrokeke xwe beşdarî “Pêşbaziya Çîrokan ya Huseyîn Çelebî” bûye xelat wergirtiye. Piştî du pirtûkên ku bi tirkî, wî berê xwe da kurdî û pirtûka xwe ya yekem a bi kurdî derxist.
Berî “Dengên Razayî” pirtûkên wî “Uçurum Çîçeklerî” (Çîrok, bi tirkî, Weşanên Aram, 2021, Amed) û “Kelebeklerin Kanadindan Yaşam” (Çîrok, bi tirkî, Weşanên J&J, 2023, Amed) derketin û niha jî pirtûka bi kurdî.

- Dengên Razayî / Îbrahîm Kaya / Weşanên Aram / Çîrok / 2025 / 104 rûpel