Diyarname
Pirtûkek nû bi navê "Çîrokên Jinên di Zindanan de" ji Weşanên Aramê derket. Di pirtûkê de 11 çîrokên jinên girtî hene.
Ji girtîgehê şandina çîrokan ji bo derve hinek zehmet e. Çîrokên di vê pirtûkê de jî li hundir ji destnivîsên jinan derketine û ew destnivîs jî di pirtûkê de hatine bi cih kirin.
Amadekariya pirtûka “Çîrokên Jinên di Zindanan de” ji aliyê rojnameger û nivîskar Roza Metîna ve hatiye amadekirin. Edîtortiya wê Enîse Şîrin û Roza Metîna kiriye.
Pirtûk bi hevkariya Komîteya Jinan a PENa Kurd, MED-DER, Komeleya Wêjekarên Kurd, Enstîtuya Kurdî ya Amedê, Federasyona Komeleyên Hiqûq û Piştevaniyê ya Malbatên Girtî û Hukumxwaran a Amedê hat çapkirin.
"ŞAHIDIYA ÇÎROKA JINAN"
Amadekarên pirtûkê li ser pirtûkê wisa dibêjin, "Di van rûpelan de xeyal, windahî, hêvî û têkoşîna jinên girtî hene. Dengê wan zincîran derbas dike û di dîrokê de nîşeyekê dihêle. Her hevok gaveke ber bi berxwedanê her riste gaveke ber bi azadiyê ve ye. Çîrokên Jinên di Zindanan de, ne tenê berhemeke edebî ye, di heman demê de şahidiyek e. Ev şahidî çîroka jinan e. Jinên barê rabirdû û hêviya siberojê hildigirin.”
NAVÊN NIVÎSKARÊN PIRTÛKÊ
Di pirtûkê de çîrokên 10 jinên girtî cih digirin. Çîrokên Besê Ozer "Şiyar", Fatma Ozbay "Mirî Birîndar Nabin", Xanim Yildirim "Xezal û Av", Leyla Saraç "Zerya-Karwanê Meytan", Medya Yaklav "Mişkê", Melîke Kaya "Welatek", Mizgîn Ronak "Çîroka Duyem", Mulkiye Dogan "Hespên Hêviyê", Necla Yildiz "Rêwîtî" û Suheyla Taş "Ji Xweliyê" di pirtûkê de hatine weşandin.
- Çîrokên Jinên di Zindanan de /Kolektîf / Weşanên Aram / Çîrok / 112 rûpel / 2025
***
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.