Diyarname
Li Meclisa Tirkiyeyê 14 partî hene. Ji van 10 partiyan pêşniyarnameya zagonê da Meclisa Tirkiyeyê ku rewşa kayûman biguhere. 
CHP'ê ev pêşniyarname da meclisê. Partiyên di Meclisê de komên wan hene DEM Partî, Îyî Partî, Saadet-Gelecek jî dê di vî warî de pêşniyarname bidin Meclisê.
Li aliyê din partiyên ku li Meclisê komên wan tune ne Yeniden Refah Partisi (YRP), Turkiye İşçi Partisi (TİP), Emek Partisi, DEVA Partisi, Demokrat Parti (DP) jî bi îmzeyên xwe piştgirî dan metna CHP'ê.
AKP, MHP, Hüda-Par û DSP ku di nav Îtîfaqa Komarê de ne piştgirî nedane vê pirsiyarnameya zagonî.
Cîgirê Serokê Giştî yê CHP'ê Gokhan Gunaydin daxuyanî da çapemeniyê, sipasiya partiyên ku piştgiriya vê pêşniyara wan kirine kir û got, "Hûn rejimeke çawa çêdikin bikin, lê tê dîtin ku partiyên siyasî û mirov li welat hene ku li dû demokrasiyê ne û ew dizanin ev demokrasî bi qasî nan û avê pêdivî ye."
Di 10 salên dawî de bi kayûmê dest danîn ser 147 şaredariyan ku piranî yên kurdan bûn.
Li gor Xala 127'an a Zagona Bingehîn Wezaneta Karên Hundir a Tirkiyeyê şaredaran ji peywirê digire û kayûman peywirdar dike.
Ev xal destûrê dide Wezareta Karên Hundir ku şaredaran ji ser kar bigire, lê xal nabêje ji dêvla şaredar ve dê kî bibe şaredar; ji ber vê valahiyê Wezaneta Karên Hundir jî bi fermanê kayûman dişîne cihê şaredarên hatine hilbijartin.
Di sala 2016'an de hikumeta Tirkiyeyê bi KHK'yê (Biryarnameya Di Hukmê Zagonê de) peyva "kayyum" li xala 45 ya ku qala "Dema serokatiya şaredarî vala bibe dê çi bê kirin" zêde kir û bi vê yekê kayûm şandin ser şaredariyan.
Piştî vê yekê di sala 2016'an de cara pêşî Wezareta Karên Hundir a Tirkiyeyê bi kayûman dest danî ser şaredariyên kurdan. Di sala 2019'an de hilbijartin çêbû, piştî vê dîsa wezaretê bi kayûman dest danî ser şaredariyan. Û îsal; di sala 2024'an de dîsa hilbijartin çêbû. Bi ser re kurtedemek derbas bû, pêşî bi kayûmê dest danîn ser Şaredariya Culemêrgê. Meha borî dest danîn ber Şaredariya Esenyurtê û vê mehê jî dest danîn ser Şaredariya Bajarê Mezin a Mêrdînê, Şaredariya Batmanê û Şaredariya Xelfetî.