Diyarname
Rêveberiya Xweseriya Demokratîk a Herêma Bakur û Rojhilatê Sûriyeyê ji bo 15’ê Gulanê Cejna Zimanê Kurdî peyam belav kir.
Di peyamê de hat gotin ku “Ziman nasnameya bingehîn a civakan e û wiha dom kir, "Ji bo her gelî jî ziman mafekî herî rewa ye. Li gorî peymanên Neteweyên Yekbûyî (NY) û Ewropayê, qedexekirina zimanê dayikê qirkirina çandî ye. Lê gelê kurd ji mafê hînbûn û axaftina bi zimanê xwe bê par mabû. Zimanê kurdî bi polîtîkayên dewletên serdest ên Kurdistanê re rastî qirkirina çandî hat. Lê tevî van polîtîkayan jî gelê kurd hebûn û zimanê xwe parastin.
Di daxuyaniyê de Cejna Zimanê Kurdî wekî "Roja hişyarbûna li dijî polîtîkayên qirkirina çandî" hat bi navkirin û wisa hat gotin, "Roja ku gelê kurd israra xwe ya di berxwedana li dijî van polîtîkayan de nû kir. Şoreşa 19’ê Tîrmehê ji bo gelên Herêma Bakur û Rojhilatê Sûriyeyê şoreşeke siyasî, civakî û leşkerî ye, di heman demê de şoreşeke çandî ye, şoreşeke li dijî hemû polîtîkayên înkar û qirkirina çandî. Bi taybet gelê me yê kurd ji Saziya Zimanê Kurdî heta avakirina Desteya Perwerde û Fêrkirinê gavên girîng di warê zimanê kurdî de avêtin. Îro li Herêma Bakur û Rojhilatê Sûriyeyê zimanên kurdî, erebî û suryanî zimanên fermî ne. Her gelek bi zimanê xwe perwerde dibe."
Rêveberiya Xweser ji ber xebatên ziman gelê kurd û xebatkarên ziman pîroz kir û got, "Em wekî Rêveberiya Xweseriya Demokratîk a Herêma Bakur Rojhilat û Sûriyeyê diyar dikin ku xebatên me dê bidomin da ku zimanê kurdî ne tenê li herêmên Bakur û Rojhilatê Sûriyeyê, lê li tevahî Sûriyeyê bibe zimanekî fermî.”