DiyarName.Com

'Li Dêrê Zargotin' derket ser dikê

Diyarname

Promîyera lîstika "Li Dêrê Zargotin" roja 31'ê gulanê li Mêrdînê li Sehneya Cureartê ya Dermansazan li dar ket, 3'yê mehê saet 20.00'an de dîsa li heman cihî tê lîstin.

Li Mêrdînê "Şano MARS" wekî komeke şanoyê dest bi xebata xwe ya şanoyê kir. Komê niha lîstika xwe ya yekemîn bi navê "Li Dêrê Zargotin" derxist pêşberî temaşevanan. Teksta lîstikê Çetoyê Zêdo saz kiriye û di heman demê de derhêneriya wê kiriye.

Di lîstikê de 6 lîstikvan rol digirin. Di sê çîrokên lîstikê de ew dikevin nav zargotina kurdî, jê gotinên xweş derdixin, bi lîstikê wan gotinan carek din bi bîra temaşevanan dixin û bi wan didin hezkirin.

LÎSTIK PIŞTA XWE DIDE ZARGOTINA KURDÎ

“Li Dêrê Zargotin” bi naverok û şêweya xwe, barê xwe ji folklora kurdî hildigire. Di vê lîstikê de sê mesel li ser sehneyê ne: Aqil Taca Zêrîn, Qûtê Salê û Şêrê Neynîkê. Di van hersê meseleyan de, her çîrok li encamekê û li gotineke pêşîyan digere. Lêgerîna aqilekî, pirsa başî û tifaqê, neheqî û daxwaza wekheviyê û jê wêdetir xwe li zar û zimanê temaşevanên giştî digre.

Bûyerên ser sehneyê bi awayekî vekirî li pêşberî temaşevanan diqewimin. Tevî vebêjer, temaşevan jî beşdarî lîstikê dibin. Di çîroka destpêkê “Aqil Taca Zêrîn” de, sê bira dikevin dû şopa dizê xwe. Çîroka duyem “Qûtê Salê” ye û ji aliyê sê destbirakan ve tê amadekirin. Di çîroka sêyem de “Şêrê Neynikê” ji bo desthilatdarîya xwe, li Şêrekî nenas digere…

Promîyera lîstikê roja 31'ê gulana 2023'yan li Mêrdînê li Sehneya Cureartê ya Dermansazan de hate li dar xistin. Lîstik rastî eleqeyeke mezin hat, salon mişt tije bûbû.

Lîstik ji bo cara diduyan li heman sehneyê ew ê roja 03.06.2023'yan, roja şemî saet 20.00 de were lîstin. Li gor gotina Şano MARS ewê li Mêrdîn û navçeyên wê listikê pêşkêş bikin û paşê ji bo tûrneyê berê xwe bidin Amed, Batman û Wanê.

LI MÊRDÎNÊ, HEMÛ LÎSTIKVAN JI MÊRDÎNÊ

Şano MARS komek şanoyê ye ku li Mêrdinê hatiye avakirin. Her wiha hemû şanoger û kedkarên komê jî ji Mêrdînê ne. Her yek xwedî karê xwe ne lê ew êvaran û dawiya hefteyê xebatên xwe yên şanoyê didomînin. Wan bi vî awayî ev lîstikek amade kiriye. Wan wekî cih heta niha sehneyên alternatîf wekî Odeya Dermansazan, Akademî Sanat, KESK û li Baroya Mêrdînê bikar anîn. Bi beşdarîya şanoger û hunermandan, komxebatên lîstikvanî û şanoyê bi Yavuz Akkuzu, Rûgeş Kirici, Serhat Kural, Îhsan Arat û Ferhat Feqî re kargehên şanoyê pêk anîn. Şano MARS, piştî van hewldan û kede yekem lîstika xwe pêşkêş kir.