Diyarname
Li Amedê saziyên kurd ji bo 15'ê Gulanê Cejna Zimanê Kurdî çalakî li dar xistin.
Di bin pêşengiya MED-Der û Yeşîl Sol Partî (YSP) de li ofîsa hilbijartinê ya YSP'ê ya li Çarşiya Peynîrfiroşan a li Sûra Amedê şahî hat li dar xistin.
Berendamên jin ên Amedê yên YPS'ê, endamên Tevgera Jinên Azad (TJA), Komeleya Jinan a Rosa, Hevseroka YSP'ê ya Amedê Pinar Sakik Tekîn, Hevseroka HDP'ê ya Amedê Gulistan Atasoy û gelek jinên din beşdar bûn.
Jinan kincên kurdî li xwe kirin û bi pankartên "Ziwanêko azad cuyêka azad", "Ez bi kurdî dijîm," "Zimanekî azad jiyaneke azad" vekirin û govend gerandin.
Jinan diruşma “Jin, jiyan azadî” jî bilind kirin.
'Ziman sedema hebûn û nebûnê ye'
Paşê rêvebera Med-Derê Dilan Guvenç daxuyanî xwend. Di daxuyaniyê de bal kişandin ser derxistina Kovara Hawarê ya ji aliyê Celadet Bedirxan ve, xebata wî ya ziman û paşê wiha hat gotin, "Bêşik ziman stûna bingehîn a hemû neteweyan e, lê ji bo kêmareyan, û bi taybetî jî ji bo kurdan sedema hebûn û nebûnê ye."
Di daxuyaniyê de hat gotin ku di dîroka kurdan de ji bo parastin û pêşxistina zimanê kurdî jinan roleke mezin lîstiye û berdêla mezin daye.
'Kurdî bibe zimanê fermî'
Di dawiyê de wisa hat gotin, "Em êdî naxwazin zimanê kurdî biparêzin yan jî ji bo pêşxistinê bangê bikin. Gere em zimanê xwe di her warî de pêş bixin. Divê kurdî bibe zimanê fermî, bibe zimanê perwerdehiyê û di warê zanist, wêje û felsefeyê de em li dinyayê belav bikin. Gere zarok û ciwanên me bi bi zimanê zikmakî, bi çanda xwe mezin bibin, bi zamanê xwe bifikirin, biaxivin, binivîsin."
Daxuyanî li ser navê Kovara Destar, TJA, DAKAp (Dicle Amed Kadin Platformu), Meclisa Jinan a Yeşîl Sol Partî, Enstîtuya Kurdî ya Amedê, Komeleya Çandê (KASED) û Komîteya Platforma Jinan a Pena Kurd hate xwendin.