Nûçe-Analîz / Diyarname

Wezîrê Perwerdehiya Neteweyî yê Tirkiyeyê Omer Dinçer got: Kurdî dikare bibe dersa hilbijêr.

AK Partî deh sal in di desthilatdariyê de ye û heta niha bi awayekî fermî tu gavek ji bo kurdî û nasnameya bi kurdî neavêtiye.

Niha li Tirkiyeyê Ak Partî dixwaze pergala perwerdehiyê li gor xwe saz bike û nîqaşên li ser vê didomin. Duh di Komîsyona Perwerdehiyê ya Meclisê de li ser vê yekê mebûsên AKP, CHP û MHP pev çûn.

Di heman demê de Wezîrê Perderdehiya Neteweyî Omer Dinçer beşdarî bernameyeke TRT'ê bû û got: "Kurdî dikare bibe dersa hilbijêr. Ev fikra min a şexsî ye. Em pergaleke nerm saz dikin; ger hûn bi îngilîzî, almanî didin hînkirin, hûn çima li ser daxwazê, dersa bi kurdî ku zimanê hemwelatiyên we ye nedin?"

Vê pirsê wezîr bila neke em jê bikin, çima? Ma megotiye nekin? Di 10 salên desthilatdariyê de kî nehişt hûn kurdî bikin zimanê qerwerdehiyê, yan jî li gor gotina wezîr "bikin dersa hilbijêr"?

Erebî dersa hilbijêr e

Serokatiya Lijneya Talim û Terbiye ya Wezareta Perwerdehiya Neteweyî (MEB) ya Tirkiyeyê biryar da ku di polên 4, 5, 6, 7 û 8'an de di beşa zimanên biyanî de yên bixwazin erebî jî wekî dersa hilbijêr bineqînin. Li gor vê yekê jî mufredata perwerdehiyê saz kir. Wezareta Perwerdehiya Neteweyî ya Tirkiyeyê di 8'ê avrêla 2010'an de biryara vê yekê girtibû.

Li Tirkiyeyê dersên hilbijêr: Çînî jî heye!

Li Tirkiyeyê bi nêzî deh dersên zimanên biyanî perwerdehî heye lê di nav van de kurdî nîn e. Li dibistanan ji bilî tirkî bi zimanên îngilîzî, alman û fransizî ders tê dayîn. Li ser van mufredat hene. Ji bilî van zimanên çînî, japonî, îtalî, rusî û spanyolî wekî zimanên hilbijêr zarok dikarin wan hilbijêrin û hîn bibin.

Kurd perwerdehiya giştî dixwazin

Digel ku AKP'ê di desthilatdariya xwe ya 10 salan de kurdî negirtiye nav dersên dibistanan û niha wekî "fikra şexsî" li ser dersa hilbijêr a kurdî nîqaş bê kirin jî kurd vê naxwazin. Kurd dixwazin ku ji dibistana seretayî heta zanîngehê kurdî bibe zimanê perwerdehiyê. Hemû saziyên kurdan ên sivîl vê yekê dixwazin. Herî dawî Şaredarê Bajarê Mezin ê Amedê û Serokê GABB'ê Osman Baydemîr* di Komîsyona Jêrîn a Lihevkirinê ya Zagona Bingehîn a Meclisa Tirkiyeyê de ev daxwaza kurdan anî ziman.

Nûçeya eleqedar:

* Baydemir: Bila rêveberiya herêmî bê sazkirin