Diyarname

Bi navê "Dîwana Jan" pirtûkek helbestan a nivîskar Jan Dost derket. Di "Dîwan"ê de helbestên ku Jan Dost di navbera salên 1987-1995'an de nivîsandine hatine weşandin.

Nivîskarê malpera me Jan Dost vê carê "Dîwan"a xwe ka ji helbestên wî yên klasîk pêk tên weşand. Jan Dost wekî gelek nivîskarên kurd bi helbestê dest bi nivîsê kiriye. Nivîskar Dost ku di van salên dawî de zêdetir bi romanê re eleqedar e niha desteke ji ew helbestên xwe yên salên paşên di "Dîwana Jan" de pêşkêşî xwendevanan dike. "Dîwana Jan" ji Weşanên Avestayê li Stenbolê derket. Berê vê jî berhemên Jan Dost ên wekî “3 gav û 3darek" (roman, 2007), “Mîrname” (roman, 2008), “Kela Dimdimê” (destan, 2011) ji aliyê Weşanên Avestayê ve hatibûn weşandin. Li gor agahiyên ku gihîştine ber destê me romaneke din a Jan Dost "Mijabad" jî dê çapa wê ya nû di dema pêşiya me de ji Weşanên Avestayê derkeve. Her wiha romana Jan Dost "3 gav û 3darek" ku çapa wê xilas bûye di rojên pêş me de dê çapa wê ya nû jî bê weşandin.
Nivîskar Jan Dost li ser çapkirina van helbestan van gotinan tîne ziman: “Sebeba çapkirina van helbestan ew e ku ez dixwazim pirekê di navbera îro û do de ava bikim. Mixabin helbesta klasîk êdî têk çûye û hema hema ji holê rabûye. Yan jî di hucre û medreseyan de maye û li ber xwe dide. Ew şêweyekî girîng e ji wêjeya me lê êdî di nefesên xwe yên dawî de ye. Piraniya helbestvanên me yên nûjen jî nikarin li ser bingeha klasîkên xwe projeyên xwe yên afirînerî ava bikin, ew li hewa daleqiyayî mane. Ji rehên xwe qut bûne. Ku dibe qal û behs jî, tenê navên mezin ji ber kirine. Nikarin di hundirê wan klasîkan de bigerin û dakevin kûrahiya deryaya klasîkan û gewheran ji xwe re berhev bikin.”

"Dîwana Jan" di sala 2010'an de ji aliyê Weşanên Sema ve ku navenda wê li Dubaî ye jî hatibû weşandin.

Dîwana Jan / Jan Dost / Weşanên Avesta / 112 rûpel

***