Diyarname
Kovara Philosophia ku demek berê ragihandibû ku dê dest bi weşanê bike niha bi hejmara xwe ya yekem gihîşt ber destên xwendevanan.
Kovara Philosophia dê çar mehan carek derdikeve. Kovara ku di bin banê Weşanxaneya Na de derdikeve, gerînendetiya weşanê Alî Gurdîlî dike. Kovarê niha hejmara xwe ya yekemîn a gulan-pûşper-tîrmeh-gelawêja 2022’yan pêşkêşî xwendevanan kir.
Wekî ji navê wê jî diyar e kovar li ser felsefeyê weşana xwe dike. Edîtoriya kovarê li ser vê yekê wisa gotiye, “Em dixwazin êdî kurd bikanibin bi zimanê xwe ê maderî jî ekolên felsefî, ramanên fîlozofên van ekolan hîn bibin û jîyana xwe a fikrî bi harîkariya wan zengîntir bikin. Em qebûl bikin jî nekin jî miletên bê felsefe mîna merivên kêmaqil in, dikanin bijîn, lê bi qasî merivên rast difikirin, rast dikin û rast dibêjin nikanin di temenê xwe de bi miradê xwe şad bibin, jiyanek bextiyar bijîn.”
Edîtorî gotiya “Em hêvî dikin her tişt bi dile we xwendevan û nivîskarên me ên delal û hêja be. Bi xwendina Philosophiaê re bi zengînkirina cihana xwe a fikrî, bimînin di xweşîyê de” kovara xwe daye ber destên xwendevanan.
Di vê hejmarê de gerînendeyê kovarê 3 nivîs nivîsîne û beşa ferhengê amade kiriye. Li aliyê din wî ligel Abdullah Kiran û Umid Demirhan re hevpeyvîn kirine. Îbrahîm Çapak, Bilal Solmaz, Lokman Polat, Nurhat Heftaro, Mahmut Ozçelik, Jan Jan û Rahul Sakrityayan bi nivîsên xwe di nav rûpelên Philosophiaê de cih girtine.
Yên bixwazin dikarin ji ser malpera www.nayayinlari.com çapa normal bixwazin û yên bixwazin dikarin ji https://play.google.com/store/books/author?id=Philosopia jî çapa dîjîtal bi dest bixin.