Enqere

Berendamên mebûsiyê yên HDP'ê li Enqereyê bi civînekê hatin nasandin. Di civînê de strana hilbijartinê ya HDP'ê jî hate eşkere kirin.

Hevserokê Giştî yê HDP'ê Sehalattin Demîrtaş di civîna nasandina berendamên mebûsiyê yên HDP'ê de axivî. Demîrtaş bi lêdana çepikan derket ser dikê, hemû kesên ji bo namzetiyê serî li wan dane pîroz kir û got ku ew ê yên nebûne namzet jî hembêz bikin. Demîrtaş diyar kir ku bi têkoşinek mezin hatine vê rojê û wiha got: "Dibe ku em 550 namzet li vir in lê em di rêyên gelekî zehmet de derbas bûne, bi ked û rondikên çavan em hatine vir. Em mînetdarê şehîdên partiyê yên ku me anîne vê rojê ne." 

Demîrtaş ji bo kedkar, meclisên jin û ciwanan ên HDP'ê jî ev tişt anî ziman: "Ew lehengên bê nav in. Wan ev xwarin amade kir û em ê jî vê yekê pêşkêş bikin. Silavên me ji van lehengên sereke re hene." 

Hevserokê HDP'ê gok ku tu tevger newêrin xwe bidin ber vê pirengiyê û wiha dom kir: "Me cesarî jiyana bi hev re ya hemû rengan kir û ev wêrekiyeke mezin e. Ligel Rojhilata Navîn di nava deryaya xwînê de ye, herêma ev 100 sal in dibin frekirinên emperyalîzmê de ye û ev hovîtiya DAIŞ'ê li holê ye, me destên xwe dane hev. Em di nava HDP'ê de ne û ev cesareteke mezin e. Ji ber vê yekê ez we pîroz dikim."

'Hêvî û bêrîkarina me yê mezin hene'

Demîrtaş diyar kir ku ew neketine nava şer û got ku desthilatdarî gengeşiyê derdixe holê. Demîrtaş da zanîn ku li aliyekê ev hilbijartineke bê dadî ye û ev yek lê zêde kir: "Tu partiyên siyasî ne neyarên me ne û em ê di çarçoveya dostane de kamapnayayên xwe bidomînin. Em bi fikrên xwe hene. Ligel hemû ferzkirina we jî em ê bi înat û bi israr, bi înada laz û zazayan bixebitin. Hêvî û bêrîkirinên me yên mezin hene. Em ber bi îstîkrarê ve dimeşin. Em ê hemû fikar û tirsa derketiye holê di encama vê hilbijartinê de ji holê rakin. Ji ber ku serkeftina HDP'ê dê ne tenê serkeftina HDP'ê be. Ev serkeftin ji Şengalê heta Kobanê û serketina hemû gelên Rojhilata Navîn e. Êvara 7'ê pûşperê her kes li ber şewqa kesk a HDP'ê şiyar bibin. Em dixwazin kesên ku dengê xwe dane û yên nedane hemû bi hêviyek mezin şiyar bibin. HDP dê serkeftina hemû gelan îlan bike."

'Em gel bi xwe ne'

Demîrtaş bi gotina, "Hûn nûnerên hemû nirxan e" bang namzetên li salonê amede bûn kir û ev tişt anî ziman: "Hûn ne tenê kurd, tirk, elewî, sunî, çerkez û laz in, hûn her kes in. Birayên me yên sunî hûn ê ji her kesî bêhtir mafên elewiyan biparêzin. Em ê bi hev re bê çawa jiyaneke wekhev ava bikin di kampanyaya hilbijartinê de nîşanî her kesî bidin. Em ji nav gel derneketine û gel bi xwe ne, ji ber vê yekê em dibêjin gel diçe meclisê."

'Ew ê me bişopînin'

Demîrtaş namzetên jin jî ji bîr nekir û got ku jinên HDP'ê hişmendiya azadiya jinan dê bilind dikin û wiha axivî: "Her ku em pêş ve diçin partiyên din dê me bişopînin. Heta ku em pêşengiyê bikin ew ê jî ka li nava HDP'ê çi diqewime me bişopînin."

'Ciwan dê şîfreya jiyana nû vebêjin'

Demîrtaş bi bîr xist ku ciwan berdêlên mezin dane û di nava têkoşînê de cih girtine. Demîrtaş anî ziman ku ciwan dê şîfreya jiyana nû di guhê hemû kesî de vebêjin.

'Divê Her gotin xizmetî gelên Tirkiyeyê bike'

Demîrtaş bi van gotinan namzetên HDP'ê hişyar kir: "Her gava ku hûn diavêjin, her gotina ku ji devê we derdikeve divê xizmetê gelên Tirkiyeyê bike." Demîrtaş da zanîn ku derbaskirina bendê mijareke din e û wiha dawî li gotinên xwe anî: "Xwedê we rûreş dernexe. Xwedê rêya me ronî bike."

DÎHA