Diyarname

TYB (Yekîtiya Weşangerên Tirkiyeyê) her sal rapora pirtûkên ku sala borî li Tirkiyeyê hatine weşandin amade û belav dike. TYB’ê rapora xwe ya îsal bi sernavê “Rapora Bazara Pirtûkan a Sala 2021’ê ya TYB’ê” bi ser malpera xwe re belav kir.

BUHABÛNA KAXIZ

TYB’ê berî belavkirina daneyan qala rewşa giran a weşangeran ya sala 2021’ê kiriye û wisa gotiye, “Ji ber ku li welatê me di dawiya sala 2021’ê de qeyrana dovîzê çêbû û ji ber qeyrana kaxiz a global sektora weşangerî ketiye nava tengasiyeke cidî. Di warê buhabûna kaxiz de kaxizê ji bo bergan sedî 200, kaxizên ji bo pirtûkan sedî 30-35, di warê kûşe kaxiz de jî sedî 100 buhabûn çêbûye.”

PÊŞKETINÊN DÎJÎTAL

Di raporê de li ser serdema pandemî jî hatiye sekinîn û hatiye gotin ku bi pandemiyê re di warê firotina online a pirtûkan, xwendina pirtûkan, di warê pirtûkên bi deng, hevdîtinên dîjîtal, sazkirina klûbên pirtûkan ên dîjîtal û gotûbêjên dîjîtal de pêşketin çêbûye.

BANDORA MEB’Ê

Raporê ragihandiye ku ji pandemî û pêşketinên din cudatir MEB’ê (Wezareta Perwerdehiya Neteweyî ya Tirkiyeyê) ji bo serdema 2021-2022’yan a perwerdehiyê, ji bo xwendekaran 17,5 mîlyon heb pirtûk wekî çavkaniya alîkar çap kirine û bê pere belav kirin. Rapor dibêje ku vê yekê bandoreke neyînî li sektora wan kiriye.

AGAHIYÊN ÎSTATÎSTÎKÎ

Di raporê de tê gotin ku li Tirkiyeyê par serê kesî 7,6 pirtûk ketiye ku ev reqem di sala 2020’î de 7,3 bû.

Va ne îstatîstîkên din:

- Sala 2021’ê de 438 mîyon û 679 hezar û 864 pirtûk hatine çapkirin. 

- Li gor YAYFED’ê (Federasyoa Yekîtiya Pîşeyan a Weşangeran) ku ew bandrolê difroşin û belav dikin par ji pêrar sedî 1.26 zêdetir pirtûk hatine çapkirin.

- MEB’ê par ji bo dibistana seretayî 111.706.468 heb, ji bo dibistana navîn 87.606.531 heb pirtûkên dersê û pirtûkên wekî çavkaniya alîkar çap kirine. Bi giştî dike 199.312.299 heb pirtûk. MEB’ê ji bo van 1.010.930.000 TL butçe xerc kiriye.

- Tevî pirtûkên MEB’ê par bi temamî 637 mîlyon û 992 hezar û 863 heb pirtûk hatine çapkirin.

- Di nav hemû pirtûkên hatine çapkirin de para MEB’ê wekî sedî 53,39 derketiye. Dûre weşangeriya çandî (lêkolîn, wêje û weşangeriya zarokan dikeve nava vê) tê ku bi rêjeya sedî 37.74 cih digire. Di warê weşangeriya çandî de 165 mîlyon, 536 hezar û 303 heb pirtûk hatine çapkirin. Li gor sala 2020’î sedî 1,07 daketin çêbûye. Di nav vê beşê de ji bo lêkolînê 90.379.535 bandrol hatine belavkirin, ji bo beşa wêjeyê 31.183.411 bandrol hatine belvkirin, ji bo pirtûkên zarokan û pirtûkên nûciwanan 43.973.357 bandor hatine belavkirin.

- Meziniya bazara pirtûkên perakende (firotinê) derketiye 9.659 mîlyon TL’yî.

 *** 

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.

***