Diyarname

Weşanxaneyê Roşna ra yew roman, yew zî hîkaye, di kitabê newey veciyay. Bi eniyan bî 7 kitabê kirmanckî ke weşanxaney emsar çap kerdê.

"ÇÊ QEMERÊ KEJÎ"

"Çê Qemerê Kejî" namey romanê niştox Huseyîn Karakaşî yo ke enka Roşna de hame çapkerdişî. Eno beno kitabê şeşin ke Huseyîn Karakaş hepisxane ra nusneno. 

Nuştoxî romanê xwu rê mintîqeyê Qerebêlî ra cûya trajîke ya yew keyeyê edetî kerda babete. Dewro klasîk de yew keyeyo karker ke hêgayanê xwu de sey morceleyî xebitîyayne û nanê xwu kerra ra vetêne, eynî wext de meymanperwer û nandar ke her kesî mird kerdêne, labelê hem tayê xûyê wuşkî yê dewijane ver, hem zî terteleyî û hereketê siyasî ke biyê miseletê koyanê welatî, senî teber ra cûya înan serûbin kerda û keye ver bi wêrankerdiş şiyo teswîr keno.

"LÎTREYA SAYAN ÇEND LÎRA YA?"

Kitabo bîn zî ê Evdî Hesqerayî ya ke namey kitabî “Lîtreya Sayan Çend Lîra ya?” ya. Di kitabê Hesqerayî de  25 hîkayeyê kilmekî estê. Emser benê di kitabê nuştoxî yê hîkayeyan ke weşanîyenê.

Yew taybetiya Hesqerayî a ya ke ew bi xwu kurmanc o û dimara kirmanckî (zazakî) mûsa wo. Ê kirmanckî de xwu zehf raver berdo û bi eno awa bi rehetî eşkeno hîkayeyan binisno. Eno kitab zî bi eno tewir hamey niştiş.

Çiyo muhîm hîkayeyê ey teqlîdî nîyê, yanî sey zafê nuştoxanê hîkayeyan sewbîna nuştoxan teqlîd nêkeno yan zî cûya dewe ra hîkayeyanê haziran nênusneno. Bi terzê xwu, bi yew awiro kirîtîk, cûya şaristanan ra, hîkayeyanê kilmekan mûneno ke merdim vîstikêk de bi tebesum waneno. 

- Çê Qemerê Kejî / Huseyîn Karakaşî /Roşna / 184 rîpelî / Roman / 2021

-  Lîtreya Sayan Çend Lîra ya? / Evdî Hesqerayî / Roşna / 64 rîpelî / Hîkaye / 2021