Diyarname
Kovara 'Kurt Tarîhî' ku sê mehan carek bi tirkî û kurdî dertê hejmara xwe ya tîrmeh-gelawêj-rezberê belav kir. Di vê hejmara xwe ya 45'an de kovarê dosyayeke li ser lêkolîner û nivîskar Mehmet Bayrak çêkiriye.
'BÎBLIYOGRAFIYA KURDNASIYÊ DEWLEMEND KIRIYE'
Mehmet Bayrak ev 50 sal in dinivîse. Ji bo 50 saliya nivîskariya wî kovarê dosyayeke li ser wî amade kiriye. Di dosyayê de çend kesan gotar nivîsandine. Îsmaîl Beşîkçî bi sernavê "Jiyaneke diyarî pirtûkan hatiye kirin: Mehmet Bayrak", Faik Bulut "Mehmet Bayrak an jî çîroka 'Derwêşê Bi Çaroxên Hesinî' yê bêhndirêj" nivîsiye. Ji bilî van nivîsên bi tirkî, Rohat Alakom jî nivîseke bi kurdî bi sernavê "Yek ji 'Bayrakdarên Kurdnasiyê' Mehmet Bayrak" nivîsiye. Alakom ji bo Mehmet Bayrak wisa nivîsiye: "Çend peyvên nifteyî ku gazî xebatên Bayrak dikin ev in: Klam, muzîk, kurdnasî, jin, elewî, dîrok, folklor û gravur. Xebat û lêkolînên wî zêtir li dorav an mijaran berhev û tîr dibin. Bi kurtî Mehmet Bayrak wek lêkolerekî berhemdar bi van xebat û pirtûkên xwe yên di nav van 50 salên dawî da derketine bîblîyografya kurdnasiyê him dewlemend û him jî rengî kiriye."
Li aliyê din nivîseke Mehmet Bayrak jî hatiye weşandin ku wî mi ser Yaşar Kemal nivîsiye.
BELGEYÊN BEDIRXANIYAN
Kovarê li ser Mehmet Bayrak dosya amade kiriye lê di berg de nivîseke din a balkêş heye bi sernavê "Li Mandaya Fransiz Dewleteke Kurdan". Nivîs ji aliyê Dr Derya Bayir ve hatiye nivîsandin. Bayir di nivîsê de bala xwe dide belgeyên fransiz ên li Cemiyeta Miletan.
Ji bilî van hin nivîsên din jî li ser dîroka kurdan natire weşandin. Ji wan Bahadin H.Kerboranî bi ser navê "Kurt Meşrutiyet Mektebî" (Dibistana Meşrûtiyeta Kurd) nivîsa xwe nivîsiye, agahiyên li ser wê dibistanê, kesên di wir de kar kiriye bi belge pêşkêş kirine.
Duygu Atlas û Bahar Başer li ser cihûyên Kurdistanê nivîsiye, Firat Sozerî jî li ser hebûna gotin û fonetîka kurdî ya di "Comparative Dictionaries Of All Languages And Dialects" gotara xwe amade kiriye.
Ji nivîsên kurdî yek jê jî Dr Nîdal Hac Derwîş bi sernavê "Dîroka Serê Kaniyê" nivîsiye. Di nivîsê de agahiyên dîrokî yên girîng hene ku heta Merwaniyan jî diçe.
Ji bo têkilî:
0212-245 81 43
0541-391 81 49
www.kurttarihidergisi.com