Cemil OGUZ

Li aliyek tîma ku îsal difire, li aliyê din şampiyonê par. Tîma ku îsal difire li pêş e, bi avarajê bi 13 pûanan di rêza yekemîn de ye. Tîma par bû şampiyon bi 10 pûanan çend pêlekan li jêr e. Loma jî zêde pêdivî bi serketinê heye. Li aliyê din ev 3 maç in li hemberî wê têk diçe û loma jî serketin jêre lazim e.

Em qala du tîmên îngilîz, tîma Chelsea û Manchester City (MC) dikin. Maç li Stada Stamford Bridge ya Chelsea ye. Ligel fûtbolhezên îngilîz, li dinyayê jî heyecana ji bo maçê li dar e.

Li aliyek T. Tuchelê ku ji par ve teknîk dîrektorê Chelse ye û ji par ve bidestxistina Kûpaya Lîga Şampiyonan jî têde bayek kûr rakiriye. Li aliyê din Pep Guardiolayê ku par tîma xwe li Preimer Lîgê kir şampiyon lê di fînala Lîga Şampiyonan de li hemberî Chelsea têk çû. Û ya muhîm jî ev sê maçên dawî ne Tuchel li hemberî Guardiola bi ser dikeve. Her ku Guardiola ye çar caran ser hev de li hemberî kesî têk neçûye.

Maç li nav dilê fûtbola dinyayê, li Îngilistanê ye, du tîmên îngilîz têne hemberî hev. Helbet ji bo lîgê hê gelek maye ji ber ku ev hê hefteya 6'an e, lê heyecan, daxwaza her du aliyan maç derxistiye asta fînalê. 

Maç li Îngilistanê ye lê tîma Chelsea xwediyê wê yekî rus, tîma MC xwediyê wê yekî ereb e. Teknîk dîrektorê Chelsea yekî alman, yê MC'yê yekî katalan e. Lîstikvan jî ji welatên cur bi cur...

Di 12 maçên dawî yên Premier Lîgê yên di navbera Chelsea û MC'yê te qet wekhevî çênebûye, Chelsea 5, MC 7 caran bi ser ketiye.

Û bi vî awayî maç dest pê dike. Ji serî ve aliyê herî zêde dixwest bi ser bikeve MC bû, loma jî hema hema gog nîşanî Chelsea nedida. Wisa bi golê dilîstin ku di deqîqeya 20'an de asta pêlîstina gogê ya MC'ê bi sedî 71 bû. Li mala Chelsea, li hemberî tîmeke wekî wê mezin ev îstatîstîkek muhîm bû. Di nivîka yekemîn de atakeke cidî ya Chelsea çênebû, lê MC'yê jî nikarî skorê biguherîne û 45 deqîqeyên pêşî wisa bi dawî bûn: 0-0.

Di nîveka yekemîn de tiştê nexweş jî ew bû ku James ê ji Chelsea seqet bû, Thiago Silva ket cihê wî.

Di nivîka duyemîn de MC carek din serdest bû û bi vê serdestiyê pêşî şût hatin, dûre jî di deqîqeya 53'yan de gola Gabriel Jesus hat. Di deqîqeyên din de encam neguherî û MC'yê serketina ku jêre wekî nan û avê lazim bû bi dest xist: 1-0.

Bi vê serketî MC bi 13 pûanan derket rêza 2'yan, Chelsea bi heman pûanan di rêza 3'yemîn de, Manchester Unitedê ku îro li hemberî Aston Villa 1-0 têk çû bi heman pûanan di rêza 4'an de ye.