Ciwan Tengezar ji bo çalakiya "100 Thousand Poets For Change (100 hezar helbestvan guherînê dixwazin)" helbesta xwe ya bi navê "Ez zarok im" şandiye, em jî ji bo vê rojê pêşkêşî we dikin.

***

Ez zarok im

serê min mist nede
ez şekir jî naxwazim
bi min re nelîze
ez xelat jî naxwazim

ez sêwî me, xem nake
ez birçî me, xem nake
ez li çolê me, xem nake
ez azadî dixwazim

ziman nasnameya min
nasnameya min zarok
azadî ye, zarok

min dilek çêkir, ew kir al
xwîn jê hat, kevokek spî bê bask û lal
min cîhaneke şîn çêkir
roj li ezmanê daliqand
bû mij û dûman
dar rût û tazî man

min tev li hev kir rengan
qaşo keskesor bû ezman
giriya hîv go neke eman
bi hêvî derbas bûm ji bin
her tişt bû ser û bin
ax û fîgan, hawar û gazin

ez zarok im zarok im
milê min milê min hûr bûye
dengê min girtiye
serê min birîne-serê min pelixiye
li meydanê mirî me

ezmana bê dawî, germahiya rojê
rengên xeyalên min hatin dizîn
bedena min di bîr û çalan de dirizin
li kolanan rengê (dengê) xwe digerim

derxe maskeya xwe polês
derxe maskeya xwe leşker
derxe maskeya xwe celad
derxe tirsonek
derxe nemerd

lêxe
cegerpola me
xeyalperest im
hestiyên min li destê te
goştê min di neynûkên te de
xwîna min diherike ji destê te
lêxe natirsim ji te
ku ez hesreta hezar salan
hêstirê dayikan
roniya paşerojê me
lêxe lêxe ku
bilûra qedexe
melodiya wenda lêxe

naêşe
nagirîm
natirsim
narim û ji bîr nakim

ala evînê li destê min
mifteya wê kevkaniya min
her xîç zengil e ji bo te
derî veke vegere xwe

gotin û muzîk: ciwan tengezar

* Ji bo çalakiya "100 Thousand Poets For Change (100 hezar helbestvan guherînê dixwazin)"

***