Diyarname

Pirtûkeke cuda li ber destên me ye: Pirtûka lîstikan, "Lîstikên Gundê Tizyanê".

Pirtûk ji aliyê Mem Mukrîyanî ve hatiye berhevkirin û amadekirin û ji Weşanên Wardozê derketiye. 

"Ji bo ku danûstandina di navbera me û zarokan de xurt bibe û em xwe bigihînin xem û xeyalên wan, gelek rê hen. Lîstik yek ji wan rêyan e." Nivîskar Mem Mukriyanî bi van gotinan dest bi pirtûka xwe dike û serboriya amadekirina vê pirtûkê vedibêje. Mukriyanî xwendevanan bi lîstikên ku dane hev û pêşkêş kirine dibe gundan û wan dide lîstin.

YEK BI YEK HEVDÎTIN PÊK ANIYE

Nifşê nû ne têde hemû nifşên berê yên kurdan her yek li gundê xwe bi lîstikan dilîst û bi wan lîstikan mezin dibûn. Bi hatina teknolojiyê re gelek ji wan lîstikan hatin ji bîr kirin, kêm ên ku nehatine ji bîr kirin jî êdî nayên lîstin. Û niha pirtûka li ber dest de wan lîstikan carek din bibîr dixe. Nivîskar Mukrîyanî çi lîstikên di bîra wî de bûn nivîsandine û paşê çûye gund carek din bi kesên li wir re daye û standine, carek din bi wan re li ser lîstikan xebitiye û ew lîstik temam kirine. Bi temamî dor du salên wî girtiye vê xebatê û di dawiyê de xebateke hêja diyarî arşîva folklora kurdî kiriye.

GELEK CUREYÊN LÎSTIKAN

Bi tam temamî 76 lîstikên gundê Tizyanê di pirtûkê de ligel wêneyên hatine xêzkirin cih girtine. Hemû lîstik çawa têne lîstin, kî, çend salî dilîzin heta kîjan demê têne lîstin hatine pêşkêş kirin. Ji 'Benkişandin', heta 'Çeroxanik', ji 'Dama' heta 'Kab', ji Nokê nîskê' heta 'Tertoq', 'Topika berfê', 'Topika dîk û mirîşkan' lîstik li benda xwendevan û li benda yên dixwazin carek din lîstikên zarokatiya xwe bilîzin di pirtûkê de ne.

ÇEND GOTIN LI SER GUND Û NIVÎSKAR

Gundê Tizyanê ku lîstik ji wir hatine berhevkirin gundekî Mêrdînê ye û 35 kîlometre li bakurê Mêrdînê dikeve. Ew jî wekî 32 gundên din yên Surguciyê (Ewîna) di bin desthilatdariya Hemî Ahmed Axayî de bû.

Nivîskar Mem Mukrîyanî di sala 1981'ê de li Tizyanê hatiye dinê. Li Zanîngeha Dîcleyê beşa mamostetî xilas kiriye. Ew karê berhevkariyê didomîne. Heta niha du pirtûkên wî derketine: "Ebando" (Çîrok, Weşanên Wardozê, 2017), "Folklora Ronahiyê" (Weşanên Wardoz, Folklor, 2018).

- Lîstikên Gundên Tizyanê/ Berhevkar û amadekar Mem Mukriyanî / Weşanên Wardoz / Folklor / 230 rûpel / 2020