Diyarname
Pirtûka Selahattin Demîrtaş "Devran" û belgefîlmê ku li ser Demîrtaş hatiye çêkirin. Her du heman rojê, ji aliyên cuda ve bûn rojev.
Pêşî belgefîlm
Koma 140journos li ser siyasetmedar û Hevserokê berê yê HDP'ê Selahattin Demîrtaş belgefîlmekî bi navê "Cografya Kaderdir" (Erdnîgarî Qeder e) çêkir. Belgefîlm bi gotina keça Demîrtaş "Bavê min nîvê şevekê ji mal girtin birin" dest pê dike. Di belgefîlm de hevdîtinên li Girtîgeha Edîrneyê, hevdîtinên bi telefonê yên Demîrtaş û jin û zarokên wî, diya wî, her wiha dîmenên Demîrtaş û zarokên Demîrtaş jî hene.
Koma 140journos ku platforma medyaya dîjîtal e û bi vîdeo belgefîlman tê nasîn, belgefîlmekî 34 deqîqeyî li ser Demîrtaş çêkiriye û belgefîlm niha di Youtube de tê hat belavkirin.
Pirtûka Demîrtaş 'Devran'
Demîrtaş li girtîgehê gelek bala xwe da hunerê. Li wir pêşî pirtûka çîrokan "Seher" (sala 2017'an) derxist, dûre "Devran" (sala 2019'an) hat û herî dawî jî îsal "Leylan" derxist.
Niha çima ev bû nûçe? Ji ber ku Şêwirmendê Serokomarê Tirkiyeyê Bulent Arinç ku di heman demê de yek ji mezinên AKP'ê ye êvara 19'ê mehê di Haber Turkê de axivî û got, "Bila her kes 'Devran'ê bixwîne. Dibe ku der barê Demîrtaş de fikra we neguhere lê bi xwendina wê dê hûnê fêm bikin ku kurdan çi kişandiye, dibe ku der barê kurdan de fikra we biguhere."
Li aliyê din di heman bernameyê de Arinç ji bo karsazê girtî Osman Kavala got, "Kavala hê girtî ye, ez ecêb dimînim, divê bê berdan. Dibe Demîrtaş jî bê berdan." Arinç li ser edaletê, li ser tiştên din jî gelek axivî.
Bi tesadufî be jî her du bûyer heman rojê derketin lê wisa diyar e di rojên pêş me de dê tiştên din jî derên.
Vaye ew belgefîlm: