Diyarname

Di kurdî de cureyên ferhengan zêde dibin. Ferhengên gotina, yên biwêjan, niha jî ya têgehên felsefî li pêş xwendevanan e. Pirtûka "Ferhenga Têgehên Felsefî" ku di bin edîtoriya M. Nesîm Dogu de wekî kollektîf hatiye amadekirin ji Weşanên Lîs gihîştiye ber destên xwendevanan.

'Ferhenga Têgehên Felsefî' di çarçoveya projeya "Ferhenga Felsefeyî ya Kurdî" de di navbera salên 2013-2017'an de hatiye amade kirin. Xebat di bin "Projeyên Lêkolînên Zanistî" de hatine bi rê ve birin û  Zanîngeha Mardîn Artûklûyê piştgirî daye projeyê. Pirtûk piştî temam bûye di sala 2019'an de ji Weşanên Lîs derketiye.

M.Nesim Dogru, Yunus Cengiz, Kamuran Gokdag, Omer Bozkurt, Necip Uyanik, Şehmuz Kurt, Umran Altinkiliç, Kenan Subaşi, Sevda Orak Reşitoglu, Ozlem Salmiş û Adnan Firat Bayar di nav xebatê de cih girtine û wan têgehên felsefî amade kirine.

Edîtorê pirtûkê ji bo vê xebatê wisa gotiye, "Vekolîna têgehên felsefî di zimanê kurdî de ji bo pêşveçûn û  hêjakirina kurdî wê bibe fersend. Pêwîst e bê eşkerekirin ku ev berhem gaveke gelek piçûk û sînordar e.  Di vê berhemê de em bi tenê li ser hin têgehên felsefî yên sereke  sekîn. Ji xeynî van gelek têgehên din jî hene ku pêwîst e bên nivîsîn û  şirovekirin. Wekî din madeyên der heqê feylesof û ekolan jî lazim e lê bên zêdekirin."

Di dawiya pirtûkê de "Têgehên Ferhegnê" bi zimanê kurdî, îngilîzî û tirkî amade kirine.

- Ferhenga Têgehên Felsefî / Kollektîf / Weşanên Lîs /Ferheng / 2019 / 181 rûpel