Diyarname
Waliyê Amedê ev 8'emîn car e butçeya 2011'an a Meclisa Giştî ya Amedê betal dike. Wekîlê Serokê Koma BDP'ê Hasip Kaplan li hemberî vê yekê nerazîbûn nîşan dan û got: "Tu aliyeke hiqûqî ya nepejirinda butçeyê ya ji aliyê walî ve nîn e. Rojekê dema me li Amedê waliyê xwe hilbijart emê vê serdestiyê têk bibin."

Endamên Meclisa Giştî ya Bajarê Amedê li ber avahiya Qeymeqamiya Yenîşehîra Amedê, biryara betalkirina butçeyê ku walî daye protesto kirin.
Digel endamên meclisê, Wekîlê Serokê Koma BDP'ê Hasip Kaplan, Mebûsa BDP'ê ya Amedê Nursel Aydogan, Serokê BDP'a Amedê Mehmet Ali Aydin jî amade bûn. Seroka Meclisa Giştî ya Amedê Fatma Sumbul daxuyanî xwend. Sumbul got ku walî bi zanatî wisa dike û ev yek cezakirina gelê Amedê ye. Sumbul wisa got: "Meclisê dema butçeya xwe amade kir xala 45'an a Zagona bi hejmara 5302'yan girt ber çavan, bi tecrubeya salên borî hemû hevkêşe nirxandin û butçe amade kir. Lê birêz walî xwe bi ser hemû zagonan re dihesibîne, biryara meclisê nepejirandiye, meclis wekî memûrên li ber destê wî dixebitin nirxandiye, pêşî li xebatên meclisê girtiye û nehiştiye em vê butçeyê bixin jiyanê."

Sumbul got ku ew bang li walî dikin ku pêdiviya xizmet û razemeniyê ya Amedê bîne cih, an na wê wî wekî waliyê ku gel wî li vir naxwaze îlan bikin.

8 meh in li gundan xizmet nayê kirin

Mebûsê BDP'ê Kaplan jî wisa got: "Vaye îro waliyê ku tayîna wî derxisiten amedê wekî waliyên kedxwariyê û li gor kêfa xwe xebata endamên meclisên partiyekê ku bi mîlyonan gelî deng dane wan ev 8 meh in asteng dike. 8 meh in xizmet naçe gundan. Li aliyekê bi mîlyonan însan, li aliyê din waliyê ku hikumetê ew peywirdar kiriye û ew jî wekî partîzanî tev digere heye. Ev pergala walîtiyê ku ji navendê tê xwe bi ser vîna gel re dibîne. Emê rojekê li Amedê waliyê xwe hilbijêrin û vê pergala walîtiyê têk bibin."