Omer Faruk Baran

Musa Anter di xatirayên xwe de mele, mamoste, şêx û şair, kurd û tirk ser gelek meşhûrên dewra xwe nivîsiye. 

Ew meşhûrên dewra Musa Anter yan li kantîna wî ya li Beyogluya Stenbolê bûne mişteriyên wî, yan di siyaset, heps û sirgûniyê de bi wî re meşiyane yan dema wî hiqûq û felsefe dixwendine ketine dersên wî, yan jî dema li Dîyarbekir midûrê otelê bûye hatine li otela wî mane.

Xêncî karên ticarî û nivîskariyê, herhal zarşêrînî û nuktezaniya Musa Anter jî kiriye ku ew di dewra xwe de derdoreke fireh çêke. 

Qîza Musa Anter, Rahşan Anter di xatirayên xwe de ji wê derdora fireh behsa Safiye Ayla dike. 

Rahşan Anter, bi gotina bavê wê, Reşê dide zanîn ku Musa Anter muptelayê muzîkê bûye û wî gelekî guh didaye ser Safiye Ayla. 

Reşê dibêje bavê wê qedr û qîmeteke giran didaye Safiye Ayla ku ew di şevên yardima bo telebeyên li dora Musa Anter bêpere, bi dildarî derdiketiye ser sehneyê. 

Li gor gotina Reşê çi gava Safiye Ayla mîkrofon di destan de li ser sehneyê bûye Musa Anter jî li şûna xwe di ber xwe de bi wê re digotiye. 

Ji muzîkên Safiye Ayla "gelse o şûh meclise naz û tegafül eylese" di bîra Reşê de maye; yanî "eger ew canika were civatê û bi naz û îşweyan xwe xafiliyê vene."

Musa Anter ji sazên Safiye Ayla ji vî pir hez dikiriye, ew tim li ser zimanê wî bûye û qîza bavê xwe, Rahşan Anter, Reşê jî werga ji wî elimîye.

Jêder: 

Anter, Musa: Tum Eserleri, Aram Yayincilik, 2021 

Kamer, Hatice: Reşê - Kizinin Gozunden Musa Anter, İletişim Yayinlari, 2022

Kolaj: Musa Anter, Safiye Ayla, Rahşan Anter