AMED
Bi hezaran kes li Birca Bizinê li hev kom bûn; ji bo qetilkirina Vedat Aydin şermezar bikin û wî bi bîr bînin heta gora wî meşiyan. Hevsera Vedat Aydin Şukran Aydin, diyar kir ku di kuştina hevserê wê de rayedarên dewletê berpirsiyar in û xwest bi lezgînî berpirsiyar bên darizandin û cezakirin.

Bi 10 hezaran amedî ji bo Serokê HEP'a Amedê Vedat Aydin ku di 10'ê tîrmeha 1991'ê de ji aliyê JÎTEM'ê ve hat kuştin bi bîr bînin, heta gora wî meşek pêk anîn.
Bi hezaran kesên li ber Birca Bizinê kom bûn, heta goristana Deriyê Mêrdînê meşiyan û Vedat Aydin bibîr anîn.
Di meşê de Serokê BDP'a Amedê M. Alî Aydin, Parlementerên BDP'ê yên Amedê Leyla Zana, Emine Ayna, nûnerên MEYA-DER, KURDÎ-DER, Însiyatifa Dayikên Aştiyê nûneren ÎHD, DÎAY-DER, KESK û xizmên Vedat Aydin jî amede bûn û li ser gora Vedat Aydin dia xwendin.

Girseyê di meşê de wêneyê mezin yê Aydin hilgirtin û qurnefil danîn cihê ku di bîranînê de polîsan êrîşê girseyê kiribû.

Li ser gorê hevsera Vedat Aydin Şukran Aydin axivî û diyar kir ku berpirsiyar ne tenê 3-4 kesên tetik-kêş, berevajî vê yên ku ferman dane van kesan, rayedarê dewletê bi xwe ne. Şukran Aydin, da zanîn ku ew jî dizanin û Serokwezîr, Serokomar û hemû wezîrên dewletê dizanin ku kujer û berpirsiyarên kuştina Aydin kî ne. Aydin, da zanîn ku bi hezaran malên wan gundên wan hatin şewitandin û zarok bê dê û bav mezin bûn. Aydin, destnîşan kir ku hemû êşa dayikan yek e û xwest êdî zarok bê dê û bav mazin nebin.

Aydin, bilêv kir ku ji bo aştî pêş bikeve divê kujer bên dîtin û darizandin û edalet bi cih bibe. Aydin got ku 5 roj berê polîsan bang li wê kir û li qereqolê 20 wêneyên kujeran li ber wê rêz kiriye û gotine 'De ka kujer kî ye nas bike' û wiha axivî: "Dayikek 3 salan zarokê wê winda bibe êdî nas nake. Lê ev ne 3 sal 20 sal di ser bûyerê re derbas bû. Zarokên wê salê niha 20 salî ne. Ez dê çawa nas bikim. Dewlet bi vê yekê dixwaze bêje 'Me wêne nîşanî wê da nas nekir.' Ev kirina dewletê li dijî zanyariyê ye. Berpirsiyar dewlet û rayedarê dewletê bi xwe ye."

Birayê Vedat Aydin Veysî Aydin jî anî ziman ku kujer diyar e û feraseta polîtîkayê înkar û îmhayê ye.