Diyarname

Piştî Qeymeqamiya Gazîosmanpaşaya Stenbolê lîstika bi kurdî "Bêrû" qedexe kir, li ser tora civakî gelek kesî piştgirî da lîstikê.

Lîstikvanên Teatra Jiyana Nû îro divê li Sehneya Şanoyên Bajêr a Stenbolê ya li Gazîosmanpaşaya Stenbolê lîstika xwe "Bêrû" bilîsta lê berî lîstinê bi çend saetan lîstik hat qedexekirin. Li ser twitterê taga "KurdTiyatrosuEngellenemez" (Şanoya Kurdî Nayê Astengkirin" hat vekirin û bi ser deh hezarî de twit hatin weşandin. Gelek sazî û kesan jî bertek nîşan dan.

Fermo hin ji wan:

- Komeleya Lêkolînên Kurdî di tiwita xwe de wisa got: "Nahêlin ku kurd bi zimanê xwe li şanoyekê jî temaşe bikin. Em vê helwesta dij-kurd û dij-kurdî şermezar dikin û gelê xwe jî jê agahdar dikin."

- Navenda Giştî ya HDP'ê di peyama xwe de got, "Kirinên wehşî yên 12'yê Rezberê nekarî vî zimanî têk bibe, hûn nikarin têk bibin. Zimanê me rûmeta me ye."

- Beşa Çandê ya HDP'ê jî wisa nivÎsî: "Hûn çi dikin bikin, çi qedexeyê îcad dikin bikin lê Şanoya Kurdî rastiya vê axê ye û ligel hemû astengiyên we jî dê mezin bibe. Ligel astengiyên pirtûkên we yên reş jî Teatra Jiyana Nû çêbû, ji ber ku hûn tune dihesibînin dê tune nebe!"

- Tora Ziman û Çanda Kurdî jî di peyama xwe de got: "Faşîzm her diçe zêdetir dibe. Niha jî şanoyên kurdî qedexe dikin. Em helwesta Qeymeqamiya Gazîosmanpaşayê şermezar dikin û divê demildest ji vê biryara vegerin."

- Komeleya Çand û Hunerê ya Mezopotamyayê jî wisa nivîsî: "Em êrîşên li dijî Çand û Hunera Kurdî  şermezar dikin." 
- Tiyatro Kooperatîfî: Baweriya me ew e li gor Danezana Mafê Mirovan a Gerdûnî û Peymana Mafên Mirovan a Ewropayê bêyî li ziman, ol, nijad û cinsiyet bê nêrîn divê huner bi awayekî azad û wekhev bê kirin. Berî lîstika TJN Bêrû bê lîstin bi çend saetan bi sedema ewlehiya raya giştî hate qedexekirin, em vê qebûl nakin.
- Kadikoy Halk Tiyatrosu: Şano ewlehiya raya giştî xira nake.

- Mebûsên HDP'ê Tayip Temel, Nuran Îmîr, Gulîstan Kiliç Koçyigit, Murat Çepnî, peyam weşandin, Meral Daniş Beştaş mesele li Meclisa Mezin a Tirkiyeyê anî rojevê.

- Stîlîstê navdar Barbaros Şansal: "Yên pirtûka olê di dest wan de deng dixwestin heta ber bi rojên ku şanoya kurdî hatiye qedexekirin.

- Mebûsên CHP'ê Mehmet Bekaroglu, Eren Erdem peyam weşandin.

- Şanoger Orhan Aydin: Ey mirovahiya dinyayê, hunermendno vê barbariyê bibînin: AKP'ê li nava Stenbolê bi îdîaya "Ji ber ku bi kurdî ye ewlehiya raya giştî xira dibe" lîstika şanoyê qedexe kir.

Lîstikvana şano û sînemayê ya tirk Nihal Yalçin got "Ji ber ewlehiya raya giştî çend saet ji bo lîstinê maye qedexe kirin! Ji bo ewlehiya raya giştî Qedexe. QEDEXE! QEDEXE! QEDEXE!"

- Hunermendên kurd ên wekî Pervîn Çakar, Rojda, Rewşan Çelîker, Sakîne Tayne, şanogerên kurd wekî Berfîn Zenderlîoglu, Yavuz Akkuzu, Berfîn Emektar peyamên piştgiriyê weşandin.

- Lîstikvan û mebûs Bariş Atay: Bi her zimanî lîstik azad, bi kurdî qedexe ye!

- Ozgur Mumcu: Ewlehiya raya giştî bi qasî ku bi lîstika Daio Go ya bi kurdî xira bibe ew qas nazik e?

**

Nûçeyên eleqedar:

- Lîstika bi kurdî 'Bêrû' hate qedexe kirin

- Şanoyên Bajêr ên Stenbolê yekem car cih da şanoyeke bi kurdî

- 'Bêrû' li Moskovayê bi Xelata Mezin hat xelatkirin 

- Dario Fo li Berlînê bi kurdî deng kir

- Di du saliya xwe de BÊRÛ

-