Diyarname
Piştî çîrokê vê carê jî paneleke li ser helbesta kurdî bi beşdariya helbestvanên kurd li dar dikeve.

Şaredariya Akdenîza Mêrsînê ku heta niha panel, mînîfestîvalên mîna Festîvala Gulan, Festîvala Karetta Karetta, Festîval-şahiya şanoyê ya zarokan ku li Tirkiyeyê ji du festîvalên şanoyê yên zarokan yek e û gelek bernameyên têvel li dar xistibû, niha jî li ser helbesta kurdî gotûbêjeke li dar dixe.

Şaredariyê meha borî li ser çîroka kurdî* bernameyeke li dar xistibû û çîroka kurdî dabû nîqaşkirin. Vê carê jî di çarçoveya rêzeçalakiyê de cih dide helbesta kurdî.
Bernameya ku bi navê "Gotûbej Li Ser Helbestê: Berê HELBEST Hêbû" wê li Salona Şaredariya Akdenîzê li dar bikeve sê helbestkarên kurd beşdar dibin.

Di bernameyê de wê helbestkar-muzîkjen Yeqîn H. ku di heman demê de nivîskarê malpera me ye; her wiha wê helbestkar Îlhamî Ozer û Dîlber Hêma amade bin û li ser helbesta kurdî gotinên xwe pêşkêşî temaşevanan bikin.

Gotûbêja "Berê Helbest Hebû" wê li ser mijara li dinyayê û Kurdistanê serboriya helbestê bê kirin û di bin çend jêrnavan de jî wê mijar were giftûgokirin.

Bermane wê roja 20'ê vê mehê, saet 13.00'an de li Salona Şaredariya Akdenîzê li dar bikeve.

***