Zinarê Xamo*

Ev 16 roj in nigê min bi sentrûm, market û dikan mikanan nebûye. Ez li ser goştê xwe hûr dibim, bûme xwê û ketime êgir. 

Min niha ji xanimê re got, xanim, bi Xwedê cinên min ji min ra dibêjin law rabe here ICA Maxîyê têr bigere û barek tişt mişt bikire û were mal.

Xanimê got, ma qey tu dîn bûyî, korona nuh li her derê belav bûye. Û ji xwe dibêjin gerek kalê wekî te neçe dikanan. Weleh belkî te bera hundur jî nedin...

Û dû re jî hinekî bi fexir got, "Ez salekê jî neçim dikanin ne xema min e.” 

Weleh bavo ez ew qasî deyax nakim, yê wê sebra Hz. Eyûbê kurmaxwarî pê re ye, min bi zor 16 roj qedandin. Ji niha da bîna min teng bûye, markêt li ber çavên min diherin û tên.

Yaho meriv 16 rojan dikanan, çûna bajêr li xwe yasax nake.

Korona malxerab tevger û kultura me jî guhert. Êdî em newêrin herin ji xwe re pakêtek şîr û mast jî bikirin. Bi rê de kî por û rîya min a sipî dibîne xwe dide alî, ji tirsa rê dide min.

Mezinên me ji me re bi dilşewatî qala berfa sor û salên xelayê dikirin, emê jî ji neviyên xwe re qala sala koronayê bikin.

Hey gidî dinyayê, qeda li te ketê, Xwedê teala bela te dayê…

XXX

Sosireta giran !!!

Daîreya tendirustiyê ya Swêd (Folkhälsomyndigheten) di anonsa xwe de wisa gotiye:

- Heger tu 70 saliyî yan jî mezintir î, dibê tu têkiliyên xwe bi der û dora xwe re kêm bikî.

Ez 70 salî me. Li gorî vê anonsê dibê xanima min û zarokên min xwe nêzî min nekin, wekî lawirekî talûke min têxin qefesekê û nan û avê bidin ber min…

Fena ku em kesên kal û pîr bûne çavkaniya mîqrobê, em giş kotî(cuzam) bûne, dibê kes xwe nêzî me neke…

*Ji bloga wî Hindik û Rindik hatiye girtin