Diyarname

Piştî ku Serokdewletê Dewletên Yekbûyî yên Amerîkayê (DYA) Donald Trump biryara vekişîna leşkerên xwe ji herêma Rojava û bakurê Sûriyeyê da û îro leşkerên DYA'yê yên li Girê Spî vekişiyan nîqaş geş bûn.

Ji aliyê kurdan, aliyê Tirkiye û aliyê DYA'yê ve îro çi qewimî? Me ew dan hev.

Aliyê Tirkiyeyê

Serokomarê Tirkiyeyê Recep Tayyip Erdogan: "Piştî êvarê axaftina me (qala bi telefonê axaftina ligel Trump dike) wekî birêz serok jî got bi paş ve kişandin didome. Li vir ligel muxataban xebat didome. Ev ne tiştek nû ye, paşeroja wê heye. Birêz Trump ferman dabû, fermana vekişînê dabû. Lê ev hatibû derengxistin. Biryara me ya ku me daye heye. Me gotibû şevek ji neşke ve emê bên. Biryardariya me didome. Ne mimkûn e em tehdîdên rêxistinên terorê qebûl bikin.

Serokê Beşa Ragihandina Serokomarê Tirkisyeyê Fahrettin Altun jî got ku êdî ew nikarin deqeyek jî bisekinin.

Wezîrê Karên Derve yê Tirkiyeyê Mevlut Çavuşoglu jî ji ser twittera xwe re nivîsî ku ewê "herêmê ji terorîstan paqij bikin û ewlehiya welatê xwe saz bikin."

Di nav hemû dengên nijadperest ên tirk de dengek cuda jî hat: Wekîlê Serokê Koma CHP'ê Engin Ozkoç ji ser twittera xwe de wisa nivîsî: "DYA ji bo Tirkiyeyê qadek ku sînorên wê nediyar e vedike. Wan û Yekîtiya Ewropayê DAIŞ'iyên ku paqij nekirin ji bo me dihêlin. Niha divê neyê ji bîr kirin ku ji gelek enî ve em di bin tehdîdê ne. Ji bo îtîbara xwe ya siyayî divê Mehmetcîkên me yên leheng ber bi avzêlka Rojhilata Navîn ve neyên dehfdan."

Berdevkê CHP'ê Faik Oztrak jî got ku rêya herî kurt a aştiya li Sûriyeyê di navbera Enqere û Şamê de ye. Ew dixwazin Tirkiye û dewleta Sûriyeyê li hev bikin. Oztrak got ku hikumeta Tirkiyeyê ligel DYA'yê peymaneke veşarî li ser DAIŞ'ê di navbera xwe de saz kiriye.

Aliyê Kurdan

- Li Girkê Legê li Qada Şehîd Xebat bi hezaran kes hatin ba hev û meşiyan. Li Til Hemis ku girêdayî Kantona Qamişloye jî bi hezaran kes meşiyan

- Li Til Helefê Serêkaniyê jî bi hezaran kes hatin ba hev û ber bi Til Erqem ve meşiyan ku Hêzên Koalîsyonê li wir hene. Gel biryara vekişîna Hêza Koalîsyona Navneteweyî şermezar dike.

- Yek ji fermandarên Meclisa Leşkerî ya Serêkaniyê Îmad Serêkaniyê got ku ew pişta xxwe nadin DYA yan jî hêzin din û got "Bila hemû dinya bizane ku ger êrîşê herêmê bê kirin dê şerê cîhanê derkeve. Em tehdîdan cidî dibînin: Êrîşek li hemberî herêma me bê kirin emê herêma xwe û gelê xwe biparêzin."

- QDS'ê ragihand ku bi piştgiriya Rusya rejima Sûriyeyê xwe amade dike ku leşkeran bişîne Minbicê. 

- Qonseya Sûriyeya Demokratîk (QSD) got ku DYA'yê pelwira xwe naniye cih û got: "Em bang li gelê xwe yê kurd, edeb, suryanî, asûrî dikin ku bibin yek û li hemberî Tirkiyeyê mafê xwe yê rewa bikar bînin û welat biparêzin."

- Kongreya Neteweyî ya Kurdistanê (KNK) banga seferberiyê li gelê kurd kir. KNK'ê got ku her kurd li ku derê dinyayê dibe bila bibe bi riyê seferberiyê, bi çalakiyan xwedî li Rojava derê.

- Lijneya Rêveberiya Navendî ya HDP'ê daxuyaniyeke nivîskî weşand, got ku Tirkiye ber bi kêmîneke kûr ve tê kişandin û got ku hemû hêzên alîgirên aştî û demakrasiyê yên Tirkiyeyê divê li hemberî vê gava îtîfaka AKP-MHP'ê bisekine. HDP'ê got ku em hemû bi hev re dikarin vê bidin sekinandin.

Aliyê Amerîka

- Pentagonê (Wezareta Parastina DYA'yê)  got ku wan hin leşkerên xwe yên li hin herêmê vekişandine.

- Nûnerê Têkoşîna Dijî DAIŞ'ê yê DYA'yê yê berê Brett McGurk (ji ser Twitterê re) biryara Qesra Spî ya vekişînê bi van gotinan rexne kir: "Trump ne serfermandar e, bêyî serê xwe biêşîne, gavên li gor serê xwe û bêfikirînê diavêje. Ew pêşî qetî qebedayiyan tevdigere, paşê dema blofa neyaran dibîne, mutefîkên me bêparastin dihêle û vê yekê bi hevdîtineke telefonê dike."

McGurt li ser endamên DAIŞ'yê yên di destê QSD'ê de jî wisa got: "Trump nizane li herêmê çi diqewime. Di destê Dewletên Yekbûyî de girtiyek jî DAIŞ'î tune ye. Ew di destê QSD'ê de ne.Û bi yek gotinê Trumpî ev girtî teslîmê Tirkiyeyê kirine."

McGurk PDF'ek du rûpel ku agahiyên li ser çeteyên DAIŞ'ê têde bûn belav kir û got ku ger em niha nekevin nava tevgerê DAIŞ dê carek din derkeve holê û xurt bibe."

- Wezîra Karên Derve ya DYA'yê ya berê Hillary Clinton jî biryara Trump rexne kir û got: "Ev hem li hemberî kurdan, hem li hemberî sonda peywira xwe îxanetek e ku dilê mirovan dixelîne.

- Senatorê Komarparêz Lindsey Graham jî ji ser twitterê re wisa nivîsî: "Haya min bi temamî ji naveroka biryarê nîn e lê li gor çapemenî dinivîse ev felaketek e. Ezê bi telefonê ligel Wezîrê Karên Derve Mike Pompeo biaxivim. Ev biryar vegera DAIŞ'ê mîsoger dike. Dehf dide kurdan ku ew herin cem Îran û Esadî.  Ji ber ku kurdan terk dike rûmeta DYA'yê binpê dike.