LERZAN JANDİL

Verê her çîyî gere bêro dîyene, ke no weçînitiş seba sîstemêde parlamenterî, seba sîstemêde demokratîk gaman eştene ju şans o. Her çiqas ke hukumatî no nîya nêwaşt kî, bi manevra muxalefetî sere de kî bi marîfetê CHPye çar partî amayî tê lewe. Bê guman bi marîfetê Akşenere HDPye nîyame zereyê nê îtîfaqî girewtene. Bê guman na derheq de argument û sebebê her partîye est ê. Her partîye gorê program û îdeolojîyê xo polîtîka virazena, îtîfaqan kena. Lê gere rind bêro zanayene, ewro mesela xêca AKP û MHPye ra meselaya partîyan pêroyine ya şîrig a. Seba naye kî gere nê partî polîtîkayêde henêne birame, ke wa her kes, her şar, her kêmîye xo naca de bivîno, xo teber ra mevîno. Lê tawo ke mordem teber ra nîya dano, hênî aseno, ke muxalefetî kî zê hukumatî HDPye ra dûrî vindeno, remeno. Lê rêyêna bêro zanayene sebebê naye her kesî ra ver Akşenere ya. Dormeyê armancanê zarurîyan de tê lewe nêamayena muxalefetî zaf rayan bîya sebebê dîktatorîye, faşîzmî. Zaf dûrî meşîme Almanya. Almanya de weçînitişanên seranê 1932 û 1933î de di partîyên girsên ke jubînî ra bêsîndor dûrî nêbî, nîyamayî tê lewe. Serde kî nê partîyî dûştê jubînî de xebetîyayî, dişmentîya jubînî kerde. Pêynîya pêynîye de Hîtler amê îqtîdar û nê her di partîyên ke nîyamêne tê lewe, kerdî qedexe û nîya kî sîstemê xo na ro. Bê guman avan kerdişê dîktatorîya Hîtlerî de xeta û sucê SPDye û KPDye gelê bî. Naca de mesela a wa, ke gelo Tirkîye de partîyên Tirkîye û partîyên Kurdan nê mîsalanên nîyanên ra çiqas derse gênê. Nê partî çiqas dûştê jubînî de xebetînê? Gelo dişmentîya jubînî kenê? Polîtîkaya ke hetkarîya hukumatî kena, ramenê? Ya kî her çiqas ke HDPye teber ra ver da kî, seba armancanên şîrigan bê dişmentîye tê lewe de her kes seba weçînitişî xebetîno? Karê Kurdan, sere de kî karê HDPye no mîyan de giran o. Gere Kurdî seba weçînitişî karêde henên bikerê, hênî bixebetîyê, ke wa kar û xebatê înan, metod û qesê kerdena înan seba şaranên Tirkîye kî bibo nimuneyêde rindek. Kar û xebatên Kurdan wa pêrodayişî ra, xeber û qesayanên xiraban ra, dûştê şexsîyetê kesan de propaganda kerdene ra dûrî, bi zonêde nerm û weş, bi dilsozîye, rakerde û roşnavîrkî bo. No hem seba şîrig cuyena Tirkan û Kurdan hem kî seba jubînî de pîya cuyena şaranên Kurdîstanî beno gamêde bingeyine. Heto bîn de, yanê hetê Kurdan de raya verêne ju îtîfaq virazîya û kes qalê boykotî nêkeno. Nê her di gamî kî gamên dîrokkî yê. Kaleka naye de na gama îtîfaqî ser de kî gamêde fîraz a. Raya verêna panc partîyên Kurdan amayî tê lewe, 2. Gulane de ju îtîfaqê weçînitişî viraşt. Şopêna: na game gamêde fîraz a. Partîya juye qij a, juye girs a, juye na wa, juye a wa. Qet problem nîyo. Xora rindîye, weşîye, marîfet kî o wo, ke nê partîyên nîya cîya cîya, qij girs amê tê lewe, seba heqanê xo yên şîrigan pîya kunê weçînitiş. Her çî ra ver gere no îtîfaq bêro zixm kerdene, seba ke tenya seba nê weçînitişî mebo, bêro xebetîyene. Yanê no îtîfaq tenya seba weçînitişî mebo, seba vereroje bibo mîsalêde balkêş, bibo sîmbolê jutîye. Seba naye kî gere her partîye hem hetê xo ra dest bierzo karê weçînitişî, şarî mobîlîze bikero, hem nê îtîfaqî bikero bingeyin, hem kî nê îtîfaqî şarî re bikero ma. Wa no îtîfaq hem mezgê partîyanên Kurdan de hem kî mezgê şarê ma de binîşo ro. Wa hênî bo, ke her reng ra, her bawerîye ra, her îdeolojî ra şarê ma bişîkîyo, bê ters, bê şupe mîyanê nê îtîfaqî de cayê xo bigêro. Eke ma bişîkîme naye bikerîme, yanê şarê xo mîyanê nê îtîfaqî de biyarîme tê lewe û mobîlîze bikerîme, seba çîyanên qijan werê menîme, qewete û moral bidêrîme jubînî, o taw ma tenya avan kerdişê sîstemêde demokratîkî de nêbenîme wayirê parêde girse, serde kî kes nêşîkîno verê jutîya ma de bibo asteng. Bi na hêvîye hem welat de hem kî Ewropa de hem seba weçînitişî hem kî seba jutîya şarê ma dest bikerîme karê xo. Bi hêvîya rojanên demokratîkan, serkewtene.
12.05.2018, Yenî Ozgur Polîtîka