Diyarname
Nivîskar Çiya Mazî helbestên xwe yên piştî salên 2000'î nivîsandine di pirtûka bi navê "Baranên Çilesrî" de pêşkêşî xwendevanan kir.

Çiya Mazî di sala 1960'î de li gundê Kufragê ya Şemrexa Mêrdînê hatiye dinê. Mazî ku zêdetir bi çîrokên xwe li nav qada kurdî hatiye nasîn, ji bilî çîrokan helbest nivîsîne, werger kiriye, lêkolîn kiriye û di van waran de berhem gihandine ber destên xwendevanan. Û niha bi pirtûka xwe ya duyemîn a helbestan dîsa li pêşberî xwendevanan e. Pirtûka "Baranên Çilesrî" ku ji Weşanên Berbangê derketiye helbestên cur bi cur pêşkêş dike. Çiya Mazî ligel nivîs û çîrokên xwe, berê ve helbest jî lê dikir. Her ku hest lê germ dibû, her ku bûyer li cihek diqewimî û wî ser pê diêşand pêre jî helbest lê dikir. Helbestên di vê pirtûkê de hatine weşandin jî bi vî rengî ne. Li ser Cizîr û Nisêbînê jî, li ser Kobanî jî helbestên ku wî nivîsandine têde cih girtine. Hestên ji bo "Çiyayê Miştenûr"ê jî, yên ji bo Helebçeyê jî bûne helbest û têde cih girtine.

Çiya Mazî kî ye?
Çiya Mazî di sala 1960'î de li gundê Kufragê ya Şemrexa Mêrdînê hatiye dinê, 25 salan di Şaredariya Şemrexê û Îdareya Herêmî (Ozel Îdare) de kar kiriye û malnişîn bûye. Ji sala 1993'yan de bi kurdî dinivîse. Di rojnameyên wekî Azadiya Welat, O.Polîtîka, kovarên wekî Jiyana Rewşen, Tîroj û gelekên din e, di malperên wekî Diyarname, Rewanbêj, Xendan û Pûkmedîa de nivîsiye. Çiya Mazî bi çîrokên de di gelek pêşbaziyan xelat jî girtine.
Berhemên wî ev in:
Kurteçîrok:
- Mistek Jiyan, 2003
- Mijarên Mîqro, 2009
- Bahol, 2011
- Peyarêk, 2013

Helbest:
Palûte, 2008
Baranên Çilesrî, 2017

Werger:
- Ahûzîn (pirtûka Muslum Yucel), 2008

Lêkolîn / Gotar
- Ferhenga Gotinên Pêşiyan, 2005
- Baxek ji folklora kurdî-ji derdora Mêrdînê, 2014
- Ez çûm ku neçûm ku, 2015

-  Baranên Çilesrî / Çiya Maçî / Weşanên Berbang / Sala Weşandinê: 2017 / 104 rûpel