Diyarname
Ev demek dirêj e li ser Amed Sporê lîstik têne lîstin û piranî jî nahêlin temaşevanên wan herin deplasmanê û piştgirî bidin wan. Îro jî wisa bû. Ji ber vê yekê Amed Spor derneket sehayê.
Maça Amed Sporê îro li Sêwasê ligel Sivas Belediye Spor hebû. Berî maçê Lijneya Ewlehiyê ya Bajarê Sêwasê biryar da ku alîgirên Amed Sporê neyên maçê û qedexeya deplasmanê dom kir. Îro maç dêsaet 13'yan de li Sêwasê bihata lîstin lê Amed Spor ji ber vê biryarê derneket sehayê.
Lîstikvan û rêveberên Amed Sporê ji ber şermezarkirina qedexeya deplasmanê ya li ser temaşevanên wan derneket maçê û ji bajar veqetiyan, ber bi Amedê ve ketin rê.

Temaşevanên Amed Sporê ji ser tora civakî re biryar da ku li Erxeniyê herin pêşiya tîmê. Tê gotin ku piştî temaşevan wan pêşwazî bikin bi hev re dê herin Tesîsên Amed Sporê.
Di Koma Sor a Lîga 2'yemîn ya Tirkiyeyê de îro maçên hefteya 19'emîn têne lîstin. Li gor rêgezên TFF (Federasyona Fûtbolê ya Tirkiyeyê) tîmek dernekeve sehayê bi 3-0 wekî têkçûyî tê hesibandin. Di rewşeke wisa de dê encamek çawa derkeve hê nediyar e.

Amed Sporê daxuyanî da
Amed Sporê piştî ev biryara xwe daxuyaniyeke nivîskî weşand û got ku wekî tê zanîn ji roja 23.12.2015'an a Maçên Koman a Kûpaya Tirkiyeyê ku ligel Başakşehîrê me dilîst di trîbunên me de pankarta "Bila zarok nemirin werin maçê" hat vekirin, ji wê rojê de qedexeya deplasmanê didome.
Amed Sporê got ku di serdemên fûtbolê yên 2015-2016 (11 maç), 2016-2017 (19 maç) û 2017-2018'an (11 maç ku hê lîg xilas nebûye) de ev qedexeya deplasmanê ya li ser temaşevanên me didome. Klûbê wisa got: "Bi kurtahî du serdem û nîv e maçên kûpayê jî di nav de di 41 maçan de em bi qedexeya temaşevanan hatine cezakirin. Di maçên kûpayên yên ligel tîmên mezin wekî Fenerbahçe û Bursasporê jî mixabin em di van maçan de bi biryareke neheq re rû bi rû mane û vê yekê reqabete newekhev derxistiye holê. Ligel van jî me dest ji ehlaqê sporê berneda û di vê çarçoveyê de me lîst. Ger îro Ankaragucu, Kocaeli, Adana Demîr, Skarya, Afjet Afyon ligel bi hezaran temaşevanên xwe tên herêma me, ligel me û tîma bajarê me ya din Diyarbekîr spor dilîze û ewlehiya wan tê sazkirin, divê ewlehiya Amed Sporê jî bê sazkirin. Ger ev qedexe tenê ji bo Amed Sporê ye wê çaxê emê bifikirin ku tiştên din li holê hene. Her wiha walîtiya ku nikare ewlehiya temaşevanên me bigirin nikare ewlehiya lîstikvanên me jî bigire. Jixwe tê zanîn li nav sehayê jî em rastî êrîşan hatine."
Rêveberiya Amed Sporê di daxuyaniyê de dibêje ku ji bo ev yek ji holê rabe wan serî li hemû rêbazan daye lê negihîştine tu encamê û wisa gotiye: "Em gihîştin wê encamê ku ev xebata sportîf ku em bi hezaran zehmetiyan didomînin bê temaşevanan bê wateye û ji bo şermezarkirina vê yekê em dernakevin maça Sivas Belediye Spor."
Klûbê bi gotina "Spor aştî, dostanî û biratî ye" dawî li daxuyaniya xwe daniye.