Amed
Dozgeriya Komarê ya Licê li ser kuştina Ceylana ku bi topên tabûrê hatibû kuştin lêpirsîneke berfireh da dest pê kirin.

Serdozgerê Komarê yê Amedê Durdu Kavak li ser bûyerê daxuyaniyeke wisa weşand:
"Di roja 28.09.2009'an saet 13.00'yan de li dora Mezraya Paşaçiya (Xambaz) a Licê teqîneke pêk hatiye, keça Raif û Saliha Ceylan Onkol a ku di 16.07.1997'an de hatiye dinê wefat kiriye. (...) Di kifşê de parçeyên teqemenî û parçeyên ku li ser bedenê keçikê hatine berhevkirin ji bo lêkolandinê ji bo Mirûdiyeta Emniyeta Amedê hatine şandin û em li bendê encama rapora pisporên madeyên teqemeniyê ne. Ji aliyê Dozgeriya Licê ve ji her alî ve lêpirsîn tê domandin, her wiha Serdozgeriya Me ya Komarê ve jî mijar ji nêz ve tê şopandin."

Li gor gotina gundiyan Tabûra Tepe ya Tabanê guleyên hawanê avêtibû û Ceylan Onkula ku çûbû ber berxitên xwe di encama vê bûyerê de bi guleyê hawayê hatibû kuştin.

Heyet çû gund

Her wiha heyetek ku ji Nûnedê Herêma Başûrêrojhilat û Rojhilat ê ÎHD'ê Ali Akinci, ji MAZLUM-DER'ê Prz. Mustafa Sarihan, ji endamê Lijneya Rêveberiya Baroya Amedê Onder Ungur û endamê Lijneya Rêveberiya Odeya Tabîbên Amedê Cengiz Gunay pêk dihat çû Licê.

Heyet li gund bi gundî û bi malbata Ceylan Onkul re hevdîtin pêk anî û di vegerê de dê raporeke amade bike.