Diyarname
Desteya Wezîran a Iraqê îro butçeya sala 2018'an a Iraqê qebûl kir. Li gorî butçeya ku hatiye qebûlkirin para Herêma Kurdistana Federe ji sedî 17 daxistine sedî 12.67.
Di dema nîqaşan de her du wezîrên kurd nerazîbûn nîşan dane û butçe îmze nekirine.
Tê gotin ku di dema nivîsandina planê de navê Herêma Kurdistanê jî wekî Parêzgeha Herêma Kurdistanê hatiye nivîsandin.
Heta 16'ê kewçêra 2017'an ku artêşa Iraqê ligel hêzên Heşdî Şebî êrîşê Herêma Kurdistana Federe kirin li gor Zagona Bingehîn a Iraqê para Herêma Kurdistanê sedî 17 bû lê ew jî nedihat dayîn. Her wiha li gor zagonê navê wê derê yê fermî jî Hêrêma Kurdistana Federe ye.
Hikumetê bang kiribû
Hikumeta Herêma Kurdistanê bang li hikumeta Iraqê kir ku projeya budçeya 2018'an erê neke.
Hikumeta Herêma Kurdistanê kêmkirina bûdçeya Herêma Kurdistanê wekî 'cezakirina bi komî ya gelê Herêma Kurdistanê' bi nav kiribû û wiha hatibû; "Di reşnivîsê de hejmara mûçegirên Herêma Kurdistanê wekî, 682 hezar û 21 kes hatiye destnîşankirin û ji bo mûçeyên mehaneyan tenê 206 milyar dînar hatiye veqetandin. Her wiha tenê 128 milyar dînar jî ji bo mûçeyên çavdêriya civakî, teqawîtan, malbatên şehîdan û kêmendaman hatine veqetandin, ku ev jî bi giştî dike 334 mîlyar dînar. Li Herêma Kurdistanê mîlyonek û 249 hezar û 481 mûçegir hene û ev jî ji bo mehekê dike 897 milyar û 500 mîlyon dînar."