Diyarname
Li herêmên Îtalyayê yên bi navê Lombardiya û Veneto ji bo ji hikumeta navendî zêdetir rayeyan bigirin referandûm li dar dixin. Dengdayîna referandûmê vê sibê dest pê kir.
Li gor nûçeya ajansa îtalyan ANSA'yê ev referandûm li herêma Lombardiya dor 8 mîlyonî, li Veneto 4 mîlyon kesî eleqedar dike. Dengdayîn li gor saeta Tirkiyeyê di saet 8'an de dest pê kir û heta 12'yê şevê dê bidome.
Dengdana li Lombardiya
Li Lombardiya yekem car cureyeke nû ya dengdanê li dar dikeve. Li cihên dengdanê ji bo referandûmê 24 hezar û 400 tablet li hilbijêran belav dikin û hilbijêr van tabletan bikar tînin û dengê xwe didin.
Navenda Lombardiya Mîlano ye û li herêma Lombardiya golên xweşik hene. Ew bi huner û muzeyên xwe jî navdar e.
Serokê Rêveberiya Herêmî ya Lombardiya Reberto Maroni piştgiriya kampanyaya "erê" dike.
Dengdana li Venetoyê
Li Venetoyê wekî her gav gel diçe cem sindoqan û deng dide. Li Veneto ji bo referandûm bê qebûlkirin pêdivî bi sedi 50+1 dengên erê heye, lê li Lombardiya mecbûriyeteke wisa diyar nekirine.
Veneto ji sala 1948'an ve herêmeke xweser e. Bajarê wê ye sereke Venedik e.
Serokê Rêveberiya Herêmî ya Veneto Luca Zaia piştgiriya kampanyaya "erê" dike.
Ger ji referandûmê erê derkeve ewê ligel hikumeta navendî dest bi bazariya mafên zêdetir bikin.
Her du serok radigihînin ku her yek 50 mîlyar Euro bacê didin Romayê û ew dixwazin ji bacê heta bikaranîna çavkaniyên herêmî di gelek waran de ew dê mafên zêdetir bixwazin.
Çapemeniya îtalyayê îdîa dike ku her du herêm bi hev şêwirîne û bi hev re heman demê referandûm li dar xistine, maliyeta referandûmê jî 65 mîlyon Euro ye.