Diyarname
Nivîskar û perwerdekarê kurdî Hasîp Yanliç ku çend meh berê hatibû girtin di danişîna yekemîn de hat berdan.
Yanliç di nav Kongreya Civaka Demokratîk û Akademiya Siyasetê ya BDP'ê de xebitî bû û dersa kurdî dabû. Di 12'yê tîrmehê de ew ji ber van yekan hatibû girtin û bi îdîaya "endamtiya rêxistinê" dihat darizandin. Dozger dixwest Yanliç bi 15 sal cezayê hepsê bê cezakirin. Danişîna dozê îro li 10'emîn Dadgeha Cezayê Giran a Amedê li dar ket. Ligel malbata Yanliç rêveberên PEN'a Kurd û hin nivîskarên kurd li dadgehê ew bi tenê nehiştin. Yanliç di danişînê de bi rêya werger parastin kir, got ku ew bi ziman û wêjeya kurdî re eleqedar e, ji ber li ser kurdî pispor e û nivîskarekî kurd e li gelek cihan dersa kurdî dide, çîrokên kurdî dixwîne. Yanliç got ku ew ne endamê KCD'ê ye, li Akademiya Siyasetê ya BDP'ê  jî ders nedaye, lê tenê bi zimanê kurdî re eleqedar e û dema bê berdan ewê dîsa dersên kurdî bide.
Parêzerê Yanliç Hayrettin Guzel jî got ku pirtûkên muwekîlê wî nivîsandine di îdîanameyê de wekî "xebatên rêxistinê" hatine nîşandayîn û kopiyek van pirtûkan da dadgehê. Piştî parastinan Yanliç bi şertê qontrola edlî hat berdan û doz ji bo meha rêbendema 2018'an hat talûqkirin.