Diyarname
Kurdekî ji Rewandizê ji ber ku di telefona wî de wêneyê Hevserokê HDP'ê Selahattin Demirtaş, Serokê YNK'ê Celal Talabanî û siyasetmedar Mehmûd Osman hebû li Balafirgeha Ataturk a Stenbolê polîsan nehişt ew bê Stenbolê û bi paş ve vegerandin.
Gelek kurdên ji gelek bajarên Başûr tên Tirkiyeyê, bi taybetî jî tên Stenbolê û digerin. Hem dema havînan, hem demên din de gelek kes tên lê vê carê rastî neheqiyê tên. Yek ji wan jî ciwanê bi navê Karzan Reşîd Nebî ye ku çendek berê dixwaze ji bo çend rojên gerê were Stenbolê. Li Balafirgeha Ataturk a Stenbolê ji balafirê dadikeve û dema ji cihê lêgerînê re derbas dibe polîs li telefona wî jî dinêrin û di telefonê de wêneyên Demîrtaş, Talabanî û Osman dibînin. Nebî ji bo Rojnewsê wisa qala vê meseleyê kiriye: "Polîsan li wir ji min re got, Demîrtaş, Celal Talebanî û Mehmud Osman terorîst in. Ji ber vê gunehbariyê jî li Balafirgeha Stenbolê 2 rojan ez hatim binçav kirin. Piştre ez dersînor kirim. Herwiha ji min re got ku careke din nabe tu bê Tirkiyeyê. Êdî Tirkiye ji bo min qedexe kir. Ciwanekî din wêneyê Abdullah Ocalan di nava telefona wî de bû, gelek li wî dan û îşkence lêkirin. Birin li cihekî nediyar. Her kurdekî başûrê Kurdistanê, eger bizanin girêdayî yek ji wan partiyên peywendiyên wan ligel Tirkiyeyê nebaşe wê dersînor bikin û çûna wan ya Tirkiyeyê qedexe dikin."
Li gor agahiyên ku ji me re jî tên van demên dawî gelek mînakên wisa li Balafirgeha Ataturk çêbûne û gelek kurdên ji Başûr piştî heqaretê bi paş ve şandine.