Diyarname
Li Edremîda Wanê bi hevkariya Şaredariya DTP'yî lîstika NÇM'ê "Em hene" hate lîstin. Lîstik bi eleqeyeke baş re rû bi rû ma.

Bi organîzeya Şaredariya Edremîdê li salona dawetê yekem car lîstikek bi kurdî hate lîstin. Şaredarê Edremîdê Abdulkerim Sayan, Serokê DTP'a navçeyê Medeni Ozer, Serokê DTP'a Kewaşê İlhami Guler, endamên meclisa şaredariyê û komek gel eleqeyeke mezin nîşanî lîstika "Em Hene" dan.

Piştî lîstina lîstikê Şaredar Sayan axaftineke kir, da zanîn ku dê li navçeyê ji niha û pêde jî çalakiyên çandî pêk bên û got ku ew dilşad in wan ev çalakî pêşkêşî gel kirine.

Lîstika "Em hene" ya Teatra Bakur a Navenda Çanda Mezopotamyayê ji aliyê lîstikvan Rûgeş Kirici, Rojbîn Elban û Dîlber Koçeroglu ve tê lîstin. “Em hene”ya Dairo Fo û Franca Rame ji aliyê  Cemil Oguz û Hemîd Dilbihar ve ji bo kurdî hatiye wergerandin.

Lîstik ji pênc kurtelîstikan pêk tê. Di lîstikê de jin zor û zehmetiyên nav rojê, kîteyên jiyana xwe pêşkêş dikin. Şert û mercên jiyanê, hestên xwe, ew hema her tiştê xwe bi hemû samimeyat xwe bi temaşevanan re par ve dikin, li hemberî zehmetiyan li çareyan digiren.