Diyarname

Di hilbijartina li Zelandaya Nû ku 17'ê mehê li dar ket de Partiya Karkeran (PK) a di bin rêberiya Jacinda Ardern de bi tena serê xwe bû desthilatdar. PK'ê bi sedî 46'ê dengan ji 120 kursiyên li meclisê 64 kursî bi dest xistin.

Li gor encamên ne fermî Partiya Neteweyî jî sedî 26.9 (35 kursî) deng girtin û bû partiya duyemîn.

Piştî 24 salan tekane desthilatdar

Zelandaya Nû ji sala 1996'an ve bi koalîsyonan tê bi rê ve birin. PK'ê di hilbijartina 2017'an de 46 kursî bi dest xistibûn û ligel Partiya Keskan a Zelandaya Nû koalîsyon çêkiribû. PK'ê di vê hilbijartinê de serketineke mezin bi dest xist û piştî 24 salan bû yekem partîk ku dê bi tena serê xwe welat bi rê ve bibe.

Serokwezîr Jacinda Ardern bi zimanê gelê herêmê, bi maorî dest bi axaftina xwe kir û diyar kir ku Zelandaya Nû piştgiriyeke mezin a 50 salên dawî daye PK'ê.

Muxalefet bi temamî têk çû

Partiya Neteweyî ku di hilbijartina 2017'an de xwedî 56 mebûsan bû niha tenê 35 kursî girtin. Partiya Pêşî Zelandaya Nû ji 7.20 dengan daket 2.7 dengan û qet kursî bi dest nexist.

Partiya Keskan ku ji derve piştgirî dabû koalîsyonê dengên xwe ji 6.27'an derxist 7.5'an û 11 mebûs bi dest xist. Partiya Çalakiyê ya Zelandaya Nû 10 mebûs, partiya gelê herêmî Partiya Maori tenê kûrsiyek bi dest xist.

Li Zelandaya Nû divê 19'ê rezberê de hilbijartin çêbiba lê ji ber vîrusa koronayê ji bo 17'ê kewçerê hatibû taloqkirin.

Li Zelandaya Nû li nav welat vîrus nayê dîtin lê 40 kesên ji derve hatine xwedî vîrus in û di bin kontrolê de ne. Heta niha li wê derê 1883 kes bi vîrusê ketine û ji wan 1818 kes baş bûne, tenê 25 kes mirine.

Koalîsyona 2017'an

Li Zelandaya nû di sala 2017'an de Partiya Karkeran xwedî 46 kursiyan bû. Bi piştgiriya Partiya Pêşî Zelandaya Nû (9 kursî) û Partiya Keskan (8 kursî) koalîsyon çêkiribû û ev sê sal bûn welat bi rê ve dibir.