Navenda Nûçeyan

Hozan Dilgeş ku ev demeke nexweşiya şekir pê re hebû, ji ber nexweşiyê her du lingên wî di ser çongan re hatin jêkirin.

Hozan Dilgeş bi nexweşiya şekir ketibû û ev du meh in, di nexweşxaneyê de dihat dermankirin. Hunermendên Tev-Çandê çûn serdana Hozan Dilgeş. Hozan Diyar li ser hesabê xwe yê instagramê wêneyek weşand ku tê de li gel her sê hunermendên kurd Xelîl Xemgîn, Peywan Arjîn, Cewad Merwanî serdana wî li nexweşxaneyê kiriye. 

Hozan Dilgeş kî ye?

Hozan Dilgeş di sala 1952´yan de ji malbateke Êzîdî li gundê Fisqînê yê Nisêbînê ji dayik bûye. Dilgeş di sala 1975´an de bi awayekî profesyonelî dest bi xebata muzîkê dike û di sala 1978´an de yekem albuma xwe ya bi navê “Ma qey bindestî para me ye” derdixe. Dilgeş di 15´ê rezbera 1979´an de ji welêt derdikeve û diçe Almanyayê. Dilgeş heta niha 8 album derxistine. Bi taybetî di salên 90'î de stranên Hozan Dilgeş di nav kurdan de ji ser zimanan nediketin. Klamên wî yên ku herî zêde têne zanîn ev in: "Lêxe gerîla lêxe", "Lo xumeynî tu xwînxwarî", "Lo muxtaro", "Bêrîvanê bêrîvanê", "Biçûkê canê"...