Mêrdîn

Zanîngeha Artûklû ya Mêrdînê li ser operasyona ku îro li hemberî xebatkarên zanîngehê hat lidarxistin daxuyaniyeke weşand û got ku Rektorê Zanîngehê ne di bin çavan de ye û li odeya wî jî lêgerîn nehatiye kirin.

Li ser fermana Serdozgeriya Komarê ya Mêrdînê der barê Zanîngeha Artûklû de bi sedema di îhaleyan de nelirêtî hatiye kirin lêpirsîn hatibû dest pê kirin. Di vê çarçoveyê de îro hin rektor û xebatkarên zanîngeh ji bo îfade bidin hatin vexwendin. Çapemeniya tirk ragihand ku 70 kes di bin çavan de ne. Rektoriya Zanîngehê daxuyaniyeke nivîskî weşand û got ku hin binçavkirin û vexwendina îfadedayînê ya xebatkarên wan di çarçoveya berhevkirina belge-agahî yên berdewama lêpirsîna ku berê hatibû kirin e û got: "Li ser vê li nav raya giştî, bi taybetî li înternetê li hemberî nasnameya zanîngeha me nûçeyên şaş têne weşandin. Mînak tê gotin ku li odeya rektorê me lêgerîn hatiye kirin, ew hatiye binçavkirin lê tişteke wisa nîn e. Hêviya me ew e ku ev pêvajoya ku saziya edlî daye dest pê kirin di kurtedemê de bi dawî bibe û rastî derkeve holê."