Diyarname
Kongreya Neteweyî ya Kurdistanê bi daxuyaniyeke nivîskî serketina Mesud Barzanî ya di hilbijartinê de pîroz kir.

Kongreya Neteweyî ya Kurdistanê (KNK) li ser hilbiartina li Başûr daxuyaniyeke nivîskî weşand, da zanîn ku bi rêjeyeke bilind gelê kurd yê vê herêmê tevlî van hilbijartinan bû, ligel hilbijartina nûnerên parlemenê, cara yekem e ku Serokê Herêma Başûrê Kurdistanê bi dengên gel hate destnîşankirin. KNK'ê got ku em vê pêvajoyê ji bo hemû kurdan girîng û biwate dibînin û dipejirînin.

Daxuyaniya KNK'ê wiha didome: "Di encama hilbijartinan de, ligel nûnerên parlemenê, birêz Mesud Barzanî jî wekî serokê Herêma Kurdistana Başûr hate hilbijartin. Kongreya Neteweyî ya Kurdistanê (KNK) encamên van hilbijartinan li hemû nûnerên parlemenê û li birêz Barzanî pîroz dike û ji wan re serkeftinê dixwaze. Nirxên ku îro li Başûrê Kurdistanê hatine afirandin encama têkoşînekê bizehmet e. Hemû gelê Başûr di vê pêvajoya têkoşînê de wezîfe hilgirtin ser milên xwe, zor û zehmetî kişandin, hê jî dikişînin. Em hêvî û daxwaz dikin ku encama van hilbijartinan, ji bo pêvajoyeke demokratîk, hemdem û azad li herêma Başûrê Kurdistanê bibe pêngaveke grîng. Bê guman ew nîşana demokrasiyê bû, lê heger berî hilbijartinan lîsteya Hîwa bi rengekî ne kanunî nehatibe qedexekirin şahiya demokrasîyê yê mezintir biba. Her wiha, KNK hêvîdar e ku ev pêvajo ji çêbûna yekîtiya neteweyî a kurd re jî encamên bixêr biafirîne."