Diyarname
Ji îro 5 nûçeyên ku derketine pêş... Fermo:

1- Dosyayê ne 'veşarî' jî dibin 'veşarî'

Dosyaya 'Kiryar Nediyar' (Faîlî Mechul) a li ser salên 90'î ev 7 sal in doz li ser didome, lê niha dozger biryara "veraşî" da û nehişt parêzer dosyayê bibînin.

Ji Milliyetê Gokçer Tahincioglu nûçe çêkir. Li Cizîrê Navenda Bîrê heye û parêzerên ji Şirnexê ji bo encama dosyayê hîn bibin çûn edliyeyê. Dosya li ser 40 kesên di salên 90'î de hatine windakirin e. Ev 7 sal in li ser dosyayê biryara veşartinê nîn e. Parêzer çûne cem dozger. Dozger gotiye hûn dikarin dosyayê bigirin. Parêzer çawa ji odeyê derketine ku herin cem nivîsgehê ku dosyayê bigirin, ku 5 deqe bi ser hevdîtina ligel dozger derbas nebûye biryara "veşarî" tê dayîn û parêzer nikarin dosyayê bigirin. Dozger ev yek di çarçoveya OHAL'ê (Rewşa Awarte) de û bi KHK'ê (Biryarnameya di Hukmên Zagonê de) biryara "veşarî" daye.

2- 'Ji bo demokrasiyê yekîtî"

Bi helwadana mebûsên CHP, HDP, SHP, BDP yên berê, nivîskar, hunermendan civîna "ji bo demokrasî yekîtî" li Navenda Çanda Kentê ya Şîşliya Stenbolê li dar ket. Serokê Însiyatîfê dadgerê berê yê Dadgeha Mafên Mirovan a Ewropayê Riza Turmen bû, Turmen axivî û got: "Ev demokrasiya girtine bin lingan niha dem hatiye em wê rakin, axê bavên ser, av bidin û bi kok bikin. Ji bo vê em li vir in."

Di temamê rojê de bi dehan kesî xeber da. Di dawiyê de encamname hat eşkere kirin û wisa hat gotin: "Tecrubeyên li dinyayê nîşan didin ku çareseriya pirsgirêka kurd divê bi awayekî aştiyane û birêyên demokratîk be." Di dawiyê de biryara Meclisa Demokrasiyê hat avakirin û ev meclis di rojên pêş de dê li hev bicive.

3- Başîka hat rizgarkirin an na?

Ajansa Reutersê ragihand ku pêşmergeyan navçeya Başîka ji çeteyên DAIŞ'ê rizgar kiriye. Başîka 12 kîlometre ji Misûlê dûr e, di heman demê de leşkerên dewleta Tirkiyeyê ku li ser daxwaza PDK'ê çûne wir, li navçeyê hene. Li gel ev agahiya hat belavkirin jî Berpersê Misûlê yê PDK'ê Seîd Memozînî diyar kir ku ev agahî ne rast e û got ku pêşmergeyan dor li navçeyê girtiye lê hê bi temamî navçe bi dest nexistiye. Li aliyê din Şêwirmendê Encumena Asayîşa Herêma Kurdistanê Mesrûr Barzanî ji ser twitterê ragihandiye ku serketina pêşmergeyan a li Başîka pîroz kir.

4- Helîkotper çadirê şirnexiyan gulebaran dike

Li gundê Xerbegê Besta ku dikeve herêma Besta gelê ku ji ber talan û xirakirina Şirnexê koç kirine û di konan de dimînin rastî êrîşê hatin. Helîkopterek nîvê şevê gule bi ser konan de barandin. Kes birîndar nebûye lê zarok û gelê li wir dijîn gelek tirsiyane.

5- ÇGD'ê rapora binpêkirina çapemeniyê eşkere kir

Li Tirkiyeyê çapemeniya muxalif ji her alî ve di bin zordariyê de ye. Li ser vê ÇHD'ê (Komeleya Rojnamegerên hemdem) raporek amade kir. Vane ji wê rapora li ser çapemenî ya 3 mehên dawî çend xal:

Ozer bîlançoya 3 mehan a ku li hemberî çapemeniyê pêk hat wiha aşkera kir:

* Rojnamgerek jiyana xwe ji dest da.

* 6 rojnameger hatin derbkirin.

* 184 rxebatkarên çapemeniyê hatin binçavkirin.

* 56 xebatkarên çapemeniyê hatin girtin.

* 6 rojnameger hedef hatin girtin û tehdît kirin.

* Der barê 8 nûçeyan de qedexeya weşanê hat dayîn.

* Der barê 2 bûyeran de qedexeya weşangeriyê hat dayîn.

* 6 sîteyên nûçeyan hatin qedexekirin.

* 2 sîteyên nûçeyan hatin girtin.

* 24 lîsansên weşana hatin îptalkirin.

* Der harê 2 rojnameyan de qedexeya derxistinê hat dayîn.

* 116 saziyên weşanê hatin girtin.

* 29 navendên weşanê û belavkariyuê hatin girtin.

* Belavkariya Kovarek Mîzahê hat qedexekirin.

* 3 navendên çapemeniyê rastî êrîşa polîsan hatin.

* Der barê 22 rojnamegeran de doz û lêpirsîn hatin vekirin.

* 6 lêpirsîn û dozên nû hatin vekirin.

* 866 rojnamger bê kar man.

* 620 qartên zer ên rojnamgeran û 32 qartên rojnamgeran ên parlementoyê hatin betalkirin.