STENBOL

Xwediyên 24'emîn Xelatên Rojnamegeriyê yên Musa Anter û Şehîdên Çapemeniya Azad a ku îsal ji aliyê Cemiyeta Rojnamegerên Azad ve hatin dayîn diyar bûn. Xelatên ku ji 1993'yan ve heta niha tên dayîn îsal jî di beşên nûçeyên kurdî, tirkî, nûçeyên bi dîmen, wêne, karîkatur û Nûçegihaniya Jinê ya Gurbetellî Ersoz de hatin dayîn. Vane kesên bi berhemên xwe bi ser ketine:

Xelata nûçeya tirkî DÎHA û Cumhuriyetê girt

Di beşa nûçeyên tirkî de ji rojnameya Cumhuriyetê Mahmut Oral bi nûçeya "Ya ji Cizîrê ma" û ji DÎHA'yê jî nûçeya Cihan Olmez a rojnameya Ozgur Gundemê de hat weşandin "Şahidê 3'yemîn jêrzemîna hovîtiyê ya Cizîrê Serhildanê vedibêje: Gulebaran kirin" bûn yekemîn. 

Başlangiç hat rûmetkirin

Endamên juriya nûçeyên tirkî Ayşe Yildirim, Kumru Başer, Tugrul Eryilmaz, Fatîh Polat û Huseyîn Aykol bûn. Vê juriyê ji ber nûçe û hevpeyvînên ku di salvegera qedexeyan de çêkir rojnameger Celal Başlangiç layiqî "Xelata Juriyê ya Rûmetê" dît.

Xeleta nûçeyên kurdî dan DÎHA'yê

Juriya nûçeyên kurdî Fehîm Işik, Ramazan Olçen, Ertuş Bozkurt, Hatîce Kamer û Zehra Tunç bûn, wan xelata yekemînî bi nûçeya "Çeteyên ku li bajarên Kurdistanê birîndar dibin li Agiriyê tên dermankirin" da nûçegihanê DÎHA'yê Gokhan Altay. 

Xelata wêneyê

Di beşa wêne de ji JINHA'yê Handan Tufan bi wêneyê xwe ya "du parçe xwelî" ya li Hezexê piştî ku qedexeya derketina kolanan hate rakirin kişandibû bû yekemîn. Di juriya wêneyê de Sebatî Karakurt, Kamîl Firat, Ramazan Ozturk, Murat Sezer û Çetîn Altun hebûn.

Xelata karîkatur

Juriya ku ji Semra Can, Gulay Batur, Kemal Gokhan Gurses, Dogan Guzel û Halîl Încesu pêk dihat xelat da Ozgur Evran ê bi berhema xwe ya "Aştî" tevlî pêşbirkê bûbû. 

Xelata nûçeya bi dîmen

Di beşa dîmenê de ji ANHA'yê Dîcle Ehmet bi berhema xwe ya "2 salan şer kir û malbata xwe ji çeteyan rizgar kir" û ji DÎHA'yê Bîlal Guldem bi berhema xwe ya "Li Nisêbînê dayik hate qetilkirin 2 zarokên wê bi giranî birîndar bû" xelat bi hev re parve kirin

Xelata Gurbetellî dan JINHA'yê

Di beşa Xelata Rojnamegeriyê ya Jinê ya Gurbetellî Ersoz de nûçegihana JINHA'yê Ferda Yilmazoglu bi nûçeya xwe ya "Li Cizîrê xwerêveberiyê mudaxaleyî zewaca di temenê zaroktiyê de kir" bû yekemîn. Di juriyê de Ayşe Duzkan, Berat Gunçikan, Burcu Karakaş, Mekiye Gonenç û Semîha Alankuş cih girtin.

Di pêşbaziyê de 100 navên ku piştgirî dan rojnameya Ozgur Gundemê û Midûrê Karên Nivîsan ê Ozgur Gundemê Înan Kizilkaya û Gerînendeyê Weşanê yê Giştî yê Ozgur Gundemê Zana Kaya, Endamên Lijneya Şewirmendiyê ya Ozgur Gundemê Asli Erdogan û Necmiye Alpay jî layiqî "Xelata Rûmetê" hatin dîtin.

Kesên bi ser ketin roja 24'ê vê mehê li Navenda Çandê ya Cîgerxwînê ya li Kayapinara Amedê bi merasîmê dê xelatên xwe bigirin.