Diyarname
Derhênerê îran Abbas Kîarostamî îro li Parîsa Fransayê wefat kir.

Ew 22'yê pûşpera 1940'î de li Tehrana Îranê hatiye dinê. Piştî salên 1960'î Pêla Sînemaya Nû li Îranê dest pê dike ku ew jî yek ji wê pêlê ye. Kîarostamî di jiyana xwe de gelek fîlmên serketî kişand ku yek ji wan jî "Tehma Gilyazan" e ku bi vî fîlmî li Cannesê Xelata Palmiyeya Zêrîn (1997) girt. Yek ji fîlmên wî ku gelek hat ecibandin jî "Ba wê me bi xwe re bibe" ku derhênerê kurd Behmen Qubadî jî têde list û di heman demê de asîstaniya wî kir. Qubadî ji Kîarostamî gelek tişt hîn bû ku mirov dikare bibêje keda Kîarostamî ketiye nava sînemaya kurdan.

Kîarostamî ligel Palmiyeya Zêrîn gelek xelatên din jî girt ku li Venedîkê Xelata Şêrê Zêrîn (1999), li Yewnanistanê Xelata Zêrîn a Alexander, dîsa ji UNESCO'yê Madalyaya Zêrîn a Federico Filminin (1997) hin ji wan in.

Li dor 40 fîlmên metrajdirêj, kurtefîlm û belgefîlm kişand. Ew ligel derhênerî hem senarîst, vesazkar, derhênerê hunerê hem saz kar bû. Ligel van taybetiyan ew hem helbestvan, fotografkêş, wênesaz û dîzaynsaz bû. Her wiha hin pirtûkên wî jî (li dor 7 heban) hatin weşandin û ew li gelek zimanan jî hatin wergerandin.