Tariq Hemo

Romanivîsê kurd Helîm Yûsiv van rojan diyardeya TRT 6 û "rewşenbîrên" kurd yên li derdora wê kom bûne, daye ber pênûsa xwe û hinekî serê xwe pê êşandî ye. Her çiqasî ku Helîm diyalogeke yek alî dike, lê dîsa jî ev mijar hêjayî guftogokirin û danûstendinê ye…
***
Biryara dewleta tirk ya vekirina TRT 6 û destûrdayîna weşana bi zimanê kurdî gelek tiştên nû bi xwe re anîn. Her çiqasî ku armanca artêş û AKP’ê ji vê TRT 6’ê pêk nehat û kurdên bakur bi serkêşiya DTP’ê xwedî li nasname û rûmeta xwe derketin, lê dîsa ji bo destnîşankirina hêza Tevgera Azadiya Gelê Kurd, mecbûriya dewleta tirk û pêwîstiya wê bi vekirina alavek mîna TRT 6’ê, hêjayî rawestandinekê ye.
Bi vekirina TRT6’ê re dewleta tirk xwest “kurdên xwe” bi hêz bike û bîr û baweriya “kurdên din” jî qels û lawaz bike û wan hêdî hêdî ber bi xwe ve bikêşe. Ev mikyackirina rûyê Tirkiyê yê reş li pêşiya Civaka Navnetewî, DYA û Yekîtiya Ewropayê ye…
Armancên ku diviyabû TRT 6 bîne holê, pêk nehatin. Berovajî vê yekê, “Kurdên din”, ev kenal wekî alaveke xapandin û razîkirinê dîtin. Kurdên AKP’ê jî, hinek ji wan li xwe vegeriyan û hêdî xwe li refê xwe girtin û hinekê din jî prosesa bê dengî û sertewandinê domandin. Ji vê yekê zêdetir, hinek, ji wan hinekan, derketin ser ekranê TRT 6’ê û piştî wergirtina destûra Erdogan, bi kurdî stranên evînî gotin!!.
TRT6’a AKP’ê qonaxek nû dest pê kir. Ez li ser xwe bêjim, bi xêra vê TRT 6 min gelek tişt nas kirin. Vê kanalê hişt ku gelek “rewşenbîr” û “kevneşoreşger” şilfî tazî xuya bibin û rastiya xîtaba wan eşkere wekî deqa rojê diyar bibe.
Bi dehan rewşenbîrên bakur hebûn, ku ji PKK’ê aciz bûn. Li dijî siyaseta wê dinîvisandin û tevdigeriyan. Hinekan ji wan digotin PKK’ê dev ji Kurdistanê berdaye û pêwîst e were teşhîrkirin û hetikandin. Yên din jî qerfên xwe bi îdeolojiya PKK’ê û têgeha “Biratiya Gelan” dikirin û bi gotina “Tirk ne birayê me ne” diqîriyan. Ji bilî van nêrînan, gelek nêrînên din jî hebûn, ku hemûyan jî PKK’ê li hemberî siyaseta dewleta tirk wekî sûcdar, teslîmkar, dijkurd, welatfiroş û xayîn li qelemê didan.
Her çiqasî ku min neheqiyek û bêrêziyek û îflasek exlaqî di xîtaba van kesan de didît jî, lê dîsa min ji xwe re digot: Dibe ku ev mirov ne bi siyaseta PKK’ê re bin û ji rêjeya zêde ya welatparêzî û kurdperwerî û netewepestiyê wan wiha axaftin û analîzekirin ji wan derdikive. Lê derket ne wilo. Rastî tiştekî din bû. Ev rastî jî bi xêra TRT6’ê hat diyarkirin û beloq xuya bû…
***

Bi xêra TRT6 min ev dît:

- Ew kesê ku PKK’ê bi “teslîmkariyê” û “destberdana ji her tiştî” li hemberî tirkan tewanbar dikir, îro li TRT 6’ê ne û vê hewledana AKP’ê û Erdogan wekî “destkeftiyek mezin” qebûl dike…

- Ew kesê ku PKK’ê reş dikir û digot “Cumhuriyeta Demokratîk” destberdana ji Kurdistanê ye, îro di hembêza TRT 6 de ye, reklama AKP’ê û Erdogan dike û erzan erzan Kurdistanê difroşe…

- Ew kesê ku PKK’ê bi “xwedîdernektina li peyva kurd û Kurdistanê” tewanbar dikir, îro li ser ekranê TRT 6 bê şerm xwe nîşanî gelê kurd dide û ji tirsa rêveberiya vê kanalê, peyva “Kurdistan” nayine ser zimanê xwe û li şûna wê “Guney Dogu” bi kar tîne.

Niha TRT 6 bûye qubletgeha vî sinifê “rewşenbîriya” kurdî. Berê, di zemanê Defter û Blokan de, başûrê Kurdistanê qiblegeha wan bû. Bi riya şelafî, mizdan û pêşkêşkirina peyvek erzan, gelek ji van “rewşenbîran” kozikên xwe li başûr çêkiribûn. Hinekan projeyên sexte nîşan didan û hinekên din jî “pirtûk” û “roman” amede dikirin.

Berî demekê yekî ji van “rewşenbîran”, ku bi navê (B. E) xwe dide nasîn, gilî û gaznicên xwe dikir û digot: Yaho ez çûme başûr da ku romanekê li ser her 8 hezar Berzaniyên enfalkirî binivisînim, lê li şûna ku zaro min hembêz bikin û bi mehan min di Hotêla 6 stêrk de vehewînin, wan tenê 200 dolar dane min. Ma wiha bibe qey. Ma ev qedir û qîmeta rewşenbîriyê ye?. Ez ji Kurdistana Azad xeyidîm??.

Bi sedan mînakên wiha hebûn, ku xwe li başûr digirtin û çavê xwe bera kurtêlên PDK’ê û YNK’ê didan. Wê demê me ji başûriyan re digot, ev çi “zibûn in” ku hûn wan li dora xwe kom dikin. Ev kesên wilo îro pesnê we didin, wê sibê li himberî we derkevin. Rastî jî wilo bû. Ev kesên ku heta duh pesnê birêz Mesûd Berzanî didan û ew wekî “Lehnegê Kurdistana Azad” didan diyar kirin, îro di TRT 6 de xizmeta Erdogan û AKP’ê dikin. Ew Erdoganê ku naxwaze Berzanî bibîne û hîna wî mîna “Serokeşîr li bakurê Iraqê” dinase.
***
TRT6 mîna bêjingekê derket. Hat û hin komikên “rewşenbîrên” seqet li ba kir û ew hemû di “qula” xwe re derbas kirin. Bi vê yekê em jî rihet kirin. Nema em xwe dixapînin û dibêjin: Yaho belkî ev kesana xwedî nêrîn û xîtab bin ha?. Em nema dubare dikin: Dibe ku ew netewperestî tund bin, ku ji siyaseta PKK’ê û DTP’ê ne razî ne û tenê evîndarê Kurdistan û kurdayetiyê ne, canê xwe fedayî welatê xwe dikin?.

Ev hemû fikrên me bi xêra TRT 6’ê vala û fiş e derketin. Niha ev “rewşenbîrên” me yên ku pêwendiya DTP’ê bi hin hêzên çepgir ên tirk re wekî “îxanetê” bi nav dikirin, cihê xwe li TRT 6’ê digrin.

Ev komikên li îflasê ketine, vê carê nêrîna xwe ya rast gotin. Ew evîndarê dirav û pûlan in, bi qasî ku kîndarê Tevgera Azadî û tekoşîna bi rûmet in…
***
Sipas ji bo TRT 6 ku rastiya van kesan diyar kir…

Sipas ji bo DTP’ê ku ev projeyê qirêj têk bir…

Sipas ji bo gelê bakur, yê ku xwedî li nasname û rûmeta xwe derket…

tariqhemo@hotmail.com