Diyarname

Weşanxaneya Endêşe ku wekî mezintirîn weşanxaneya pirtûkên wêjeya kurdî ye (bi zaravayê Soranî, li başûrê Kurdistanê) ev sêyemîn sal e ku festîvaleke rewşenbîrî û hunerî li dardixîne. Festîval îsal 14'ê mehê dest pê dike û 16'ê mehê bi dawî dibe.

Di her sê rojên festîvalê de bi dehan nivîskar û hunermendên kurd amade dibin û bi dehan çalakiyên wêjeyî û hunerî têne dirustkirin. Di festîvala îsal de jî Endêşe bi dehan pirtûkên nû pêşkêşî xwendevanên kurdî dike. Yek ji wan berhemên ku nû li soranî hatiye wergerandin û wê di festîvalê de bê belavkirin romana nivîskarê malpera me Helîm Yûsiv "Gava ku masî tî dibin" e. Her wiha roja diduyan (15'ê mehê, roja yekşemê) a festîvalê ji bo Helîm Yûsiv û Bextiyar Elî hatiye terxankirin. Wê her du nivîskar behsa romanên xwe bikin, her wisa wê pirtûkên xwe ji bo xwendevanên romana kurdî îmze bikin.

Her sal di festîvalê de romannivîsekî kurd tê xelatkirin. Heta niha Eta Nehayî ji rojhilatê Kurdistanê û Bextiyar Elî ji başûrê Kurdistanê hatine xelatkirin. Xelatgirê îsal yê romana kurdî wê di roja sêyem ya festîvalê de bê destnîşankirin.

Ji bilî pirtûkan albumên hunermendan jî têne belavkirin û îmzekirin, îsal mêvanê festîvalê hunermend Behcet Yehya ye. Her sê rojan bernama festîvalê piştî nîvro, di demjimêr 14:00'an de dest pê dike.