Diyarname

Şaredariyên DBP'ê ev du roj in xebatek bi navê  “Rêveberiyên Xwecihî Rêveberiya Cewherî Nîqaş Dikin” dabû dest pê kirin û îro bi daxuyaniyek ev xebat hat bidawîkirin. Hevşaredarê Mêrdinê Ahmet Turk daxuyanî xwend û got: "Rêveberiya ji cihê xwe ve ji meseleya kurd cudatir e û Tirkiye divê bi lezgînî vê meseleyê çareser bike. Divê Tirkiye îtîraza li hemberî 'Şertê Xweseriya Rêveberiyên Xwecihî ya Yekîtiya Ewropayê (YE)' deyne aliyek û vê biryaya YE'yê qebûl bike."

Di dema daxuyaniyê de Hevşaredarên Amedê Gultan Kişanak û Firat Anli, Hevşaredarê Sêrtê Tuncer Bakirhan, Hevşaredara Wanê Hatice Çoban, Hevseroka DBP'ê Emine Ayna û endamên meclisên şaredariyan jî amade bûn.

Vaye ji gotinên Turk çend xal:

- Kurd bi sedan salan li ser erdê xwe bi awayekî xweser jiyane. Ev daxwaza kurdan a dîrokî û meşrû careke din wekî daxwazek derveyî zagonî hat nîşandayîn. Li ser pirsa 'Kurd çi dixwazin?', kurd bersiva 'Xweserî', 'Xweseriya cewherî' dixwazin didin.

- Ev daxwaza dîrokî û rewa ne derveyî qanûnan e. Ji Zagona Bingehîn a sala 1921'ê û heta îro di gelek deqan de xweserî heye. Şertê Xweseriya Rêveberiyên Xwecihî ya Yekitiya Ewropayê ji aliyê hiqûqa navneteweyî ve jî hatiye mîsogerkirin. Bila Tirkiye îtîraza li ber vê xala YE'yê rake û vê xalê qebûl bike.

- Di çareseriya pirsgirêka kurd de çareseriyek bê statu çênabe. Heta ev pirsgirêk çareser nebe berdêlên ku em hemû didin her diçe zêdetir dibin. Ji pirsgirêka kurd cudatir rêveberiya ji xwecihî pêdiviyeke lezgîn e. Di van demên dawî de li hemberî rêveberiya yek kesî ev daxwaz lezgîntir bûye. Jixwe di bin vê dijwariya li hemberî kurdan de tirsa ku ev daxwaz dê li hemû welat belav bibe heye. 

- Rêveberiya cewherî hem ji bo çareserkirina pirsgirêka kurd hem jî bo avakirina aştiyê gelekî diyarker e û em rêveberiya cewherî wekî daxwazeke rewa û demokratîk û mafekî xwezayî dibînin.

- Komara Tirkiyeyê û hikumet li hemberî xweseriya cewherî ya gel bi hurmet be, dawî li zordariyan bîne û li gor rêgezên hiqûqa gerdûnî tevbigere. Em bang li hikmeta tirk dikin ku bi awayekî demokratîk û wekhevî welat ji nav kaosê derxe.

Piştî daxuyaniyê Hevşaredarên Bajarê Mezin ê Amedê Firat Anli, Hevşaredarê Sêrtê Tuncer Bakirhan, Hevşaredarê Bajarê Mezin ê Mêrdînê Ahmet Turk û Hevseroka Giştî ya DBP'ê Emîne Ayna, çûn serdana Şaredariya Sûrê ku hevşaredarên wê hatine zindanîkirin.