Diyarname

Enstîtuya Kurdî ya Brukselê ji bo nivîskarê kurd Mahmud Baksî bîranîneke li dar dixe.

Nivîskar û rojnamegerê kurd di 19.12.2000'î de jiyana xwe ji dest da. Di 8'emîn salvegera Baksî de Enstîtuya Kurdî ya Brukselê ji bo Baksî çalakiyeke bîranînî li dar dixe. Çalakî dê 20'ê vê mehê li dar bikeve. Di çalakiyê de Elin Clason wê li ser "Jiyana Mahmûd Baksî a li Swêdê",
Medenî Ferho li ser "Ciyê Mahmûd Baksî di nivîskariya (berhemên edebî) kurdî de", Memo Yetkîn li ser "Mîna kurdekî Mahmûd Baksî çawa bû?" û Mîrhem Yigit jî wê li ser "Rojnamegeriya Mahmûd Baksî" bisekine û dîtinin xwe bîne ziman.

Nivîskar û rojnameger Mahmûd Baksî di sala 1944'an de li Suphiyê gundê Hezoya Batmanê hatiye dinê û di 19.12.2000'an de li Stockholma Swêdê jiyana xwe ji dest daye.

Ew nivîskar û rojnameger bû. Ji sala 1967 û vir ve heta roja xwe ya dawî li ser pirs û jiyana kurdan bi nîvîs û pirtûkên xwe bê rawestan sekinî. Destpêka rojnamegeriya wî li Batman Postasiyê bû.

Di sala 1968'an de ew bû serokê TÎP'a Batmanê (Partiya Karkeran a Tirkiyeyê). Di sala 1969'an de bi navê Mezra Botan romana wî ya yekem li Stenbolê derket. Paşê di sala 1970'yî de pirtûka xwe ya bi navê Sadî Akkiliç Davası derxist. Sadi Akkiliç komunîstekî tirk bû û ji ber gotareke wî heft sal û nîv cezayê hepsê lê birîbûn.

Mahmûd Baksî di wan salan de sendîkavan bû û wî karê xwe yê sendîkavaniyê li DÎSK'ê didomand. Karê wî yê sendîkavaniyê ji sala 1968'an heta 1970'yî dom kir. Paşê bi hinceta ku ew kurdîtiyê dike û ji ber her du pirtûkên wî ên ku hatin çapkirin, 15 sal cezaya hepsê lê hate birîn. Loma di 1970'yî de ji bêmecaliyê mecbûr ma ku derbasî almanya bibe. Di sala 1970'yî de derbe pêk hat u  Baksî nekarî vegere Tirkiyeyê. Di sala 1971'ê de ew çû Swêdê û li wê derê bi cih bû.

Mahmûd Baksî li Swêdê jî vala nesekinî û heta dawiya jiyana xwe nivîsand. Wî heta niha 22 pirtûk nivîsandine û pirtûkên wî wergeriyane gelek zimanan. Lê Baksî bi xwe bi sê zimanan; bi kurdî, tirkî û swêdî dinivîsand.

Mahmûd Baksî di 19'ê meha 12'an ya 2000'î de li Stockholmê çû ser dilovanoniya xwe û niha li Diyarbekirê veşartiye.

Çalakiya bîranînê:
Roj: Şemî, 20.12.2008, Saet 19.00 – 21.30
Cih: Rue Bonneelsstraat, 16 – 1210 Bruksel

Ji bo têkilî:
Koerdisch Instituut te Brussel
Bonneelsstraat, 16 - 1210 Brussel
Tel. 00 32 02 230 89 30,  Fax 00 32 02 231 00 97
kib@skynet.be  -  www.kurdishinstitute.be