‌Piştgiriyên li başûrê Kurdistanê yên ji bo HDP'ê berdewam dikin. Di vê çarçoveyê de Cîgirê Yekemîn ê Sekreterê Civata Navendî yê YNK'ê Zubêr Osman wiha got: “Erkê hemû partî û kurdekî ye piştgiriya xwe ji bo HDP'ê nîşan bide. Piştgirîkirina Erdogan û partiya wî jî, xiyaneta li netewe û welat e.”

Di vê derbarê de Osman di daxuyaniyekê de wiha got: “Erkê li ser milê her kurdekî Kurdistana mezin e ku piştgiriyê li partiya kurdî bikin û ji bo bibe sedemê avakirina dewleta kurdî. Ji bo bigihin armanc û hêviyên xwe. Li cîhanê tekane neteweya bê dewlet kurd in. Deshilatdariya Herêma Kurdistanê ezmûneke herî baş e û ji bo cîhan çavê xwe bide vê yekê ku kurd dikarin xwe bi rê ve bibin.”

Zûbêr Osman di berdewama axaftinên xwe de wiha got: “Serkeftina pêvajoya aştiyê li Tirkiyê, bêyî kurdan ne gengaz e û serkeftina HDP'ê wê pêvajoyê bixe di qonaxekî din de.”

Cîgirê Sekreterê Civata Navendî yê YNK'ê wisa dom kir: “Hinek aliyên kevneperest ên kurd û bi taybet li başûrê Kurdistanê, hinek partiyên Îslamî yên hêviya xwe bi Sultanan girê didin; piştgiriya Erdogan û partiya wî dikin. Ev jî ji bo mana partiya wî û jinavbirina doza kurd e. Ev jî dikeve çarçoveya xiyaneta netewî û welat de.”

Osman di daxuyaniya ji bo PUKcc.net de bal kişand ser piştgiriya ji bo HDP'ê û wiha dawî li axaftina xwe anî: “Erkê hemû partî û kurdekî bi şeref ew e ku piştgiriya HDPê bike. Em berî her kes û aliyekê, bi dil, xwîn û giyanê xwe piştgiriya xwe ya ji bo HDP û doza rewa ya gelê kurd dubare dikin. Em li benda serkeftina mezin in.”