HESEKÊ

Li taxa Miftî ya bajarê Hesekê, li 2 cihên cuda li hemberî welatiyên ku Newroz pîroz dikirin, êrîşên bombeyî pêk hatin. Di êrîşan de gelek kesan jiyana xwe ji dest da.

Li gorî agahiyên ku nûçegihanên ANHA’yê ji herêmê ragihandine, teqîna yekemîn saet derdora 18.00’an de li rojavayê Qada Şehîdan ku şahiya Newrozê lê hatibû lidarxistin pêk hat. Hate gotin ku piştî şahiya li herêmê, dema ku komek ciwanan li dora agir govend digerand, bombeya ku ji berê de li wir hatibû bicîhkirin, hate teqandin. Li gorî agahiyên destpêkê di teqînê 5 kesan jiyana xwe ji dest da.

Di heman deqeyan de, li heman taxê li miqabilî avahiya PDKS’ê ku li wir jî şahiya Newrozê dihat lidarxistin, bi tirimpêlek bombebarkirî êrîş pêk hat. Di êrîşa ku di dema pîrozbahiyê de pêk hat de, gelek kesan jiyana xwe ji dest da û birîndar bûn.

Nûçegihanê ANHA’yê jî birîndar bû

Nûçegihanê ANHA’yê ku pîrozbahiyên Newrozê dişopandin, di dema êrîşan de ji lingê xwe birîndar bû. Necar li nexweşxaneya bajar hate dermankirin

Asayîşê daxuyanî da: 17 şehîd hene

Fermandariya Giştî ya Hêzên Asayîşa Rojavayê Kurdistanê diyar kir ku derbarê êrîşên li dijî welatiyên ku li Hesekê şahiya Newrozê li dar dixistin de lêkolînên didomin û ji gel xwest ku li gorî biryara Rêveberiya xweser a derbarê Newrozê de tevbigerin.

Asayîşê wisa got: “Piştî têkçûnên çeteyên DAIŞ’ê yên li pey hev li hemberî berxwedana şervanên YPG’ê û YPJ’ê li herêma Cizîrê ji bajaroka Til Hemîs, Til Birak, Til Temir û Serêkaniyê, çete hewl didin li dijî welatiyên sivîl ên bajarê Hesekê ku şahî li dar dixistin, di şeva Newrozê de saet di 18.30’an de êrîş pêk anîn. Di encama êrîşa çeteyan de nêzî 17 welatiyên sivîl ku piraniya wan zarok û ciwan bûn jiyana xwe ji dest dan û bi dehan jî birîndar bûn. Em wekî hêzên Asayîşa Rojavayê Kurdistanê ji welatiyên xwe re diyar dikin ku lêkolînên me derbarê bûyera terorîst de didomin. Em ê encamên lêkolînan ji bo welatiyan ragihînin. Em bang li welatiyên xwe dikin ku li gorî biryara Rêveberiya Xweseriya demokratîk tevbigerin û ji bo ewlekariya welatiyan di şahiyên Newrozê de li hev kom nebin. Di dawiyê de em sersaxiyê ji malbatên şehîdan re dixwazin û şifayetê ji birîndaran re dixwazin.”

Bi hezaran kes ji bo xwîndayînê herikîn nexweşxaneyan

Piştî ji bo birîndarên li nexweşxaneyên li Hesekê, Amûdê, Dirbêsiyê û Qamişlo, banga lezgîn a xwînê hate kirin, li bajarê Qamişlo bi hezaran kes çûn nexweşxaneyên Nur, Nafiz û Rehmê. Welatî li her sê nexweşxaneyan ji bo birîndaran xwînê didin.

Kordînasyona Kantonan: Êrîş nikarin vîna gelê bişikînin

Kordînasyona Giştî ya Kantonên Rojava bi daxuyaniyeke êrîşên bombeyî yên li Hesekê şermezar kirin û got: “Ev êrîş nikarin hêz û vîna me bişikînin. Em bang li gelê xwe dikin ku bi hêzên Asayîşê û YPG’ê re alîkar bin da ku xwe ji zehmetiyên êrîşên terorê biparêzên û wekî rêzdariyek ji bo pakrewanan 21 Adarê tu ahengan û lihevkombûnan li Kantona Cizîrê li dar nexin.”

Hejmara şehîdan zêde dibe

Li gor agahiyên nû ku tê her ku diçe hejmara şehîdên Hesekê zêde dibe. Tê gotin ku heta niha 33'î şehîd çêbûne ku 5 jê zarok in.