BRUKSEL

Encamnameya 11'emîn Konferansa Kurd a li Parlamentoya Ewropa, hat eşkerekirin. Di encamnameyê de bang li civaka navneteweyî hat kirin ku 1’ê Sermawezê wekî "Roja Cîhanê ya Kobanê" îlan bike û her wiha projeya ku Rêberê PKK'ê Abdullah Ocalan ji bo çareseriya pirsgirêka kurd amade kiriye jî esas bê girtin.

Konferans rojên 10-11'ê vê mehê li Parlamentoya Ewropayê lidar ket. Encamnameya konferansê îro hat eşkerekirin. Di encamnameyê de hat diyarkirin ku Rêberê PKK'ê Abdullah Ocalan, alimê olî Desmond Tûtû yê ji Afrîkaya Başûr û Serokê Parlamentoya Ewropayê (PE) Martîn Scultz bi nivîskî peyam şandine konferansê, ji Tirkiye, Ewropa û DYA rojnamevan, akademîsyen, siyasetmedar çareseriya pirsgirêka Kurd a li Tirkiyeyê girtine dest.

Di encamnameyê de hat diyarkirin ku endamtiya Tirkiyeyê ji bo Yekîtiya Ewropayê (YE) wê ji bo çareseriya pirsgirêka kurd bandoreke erênî çêbike û wiha hat gotin: “Îhtîmal heye ku pêvajoya çareseriyê ya niha bi xitimandinekê re rû bi rû were.” Hat ragihandin ku konferansê diyar kiriye astengiyên di pêvajoyê çareseriyê de derdikevin holê dikare di demeke kurt de bên çareserkirin û aştî bê muzakerekirin.

‘DIVÊ PROJEYA OCALAN A MUZAKEREYA AŞTÎ Û DEMOKRASIYÊ ESAS BÊ GIRTIN’

Encamname wiha didome: “Pêwîstiya kurd û gelên din ên li Tirkiyeyê dijîn bi muzakereyên rast ên di navbera Ocalan û Erdogan de bên meşandin heye.”

Di encamnameyê de hat diyarkirin ku dema bikevin pêvajoya aştiyê divê beşên di rola şopandin û hêsankirinê de bikevin dewreyê û wiha hat xwestin ku ji bo vê yekê komîteyeke şopandinê bê sazkirin.

Di encamnameyê de hat destnîşankirin ku divê şert û mercên Ocalan bên başkirin, ji bo vê jî bingeheke hiqûqî were amadekirin û wiha dewam kir, “Divê azadiya ku Ocalan ekîba xwe ava bike û bi rê ve bibe hebe.”

Dîsa hat hat gotin ku divê çareserî ji aliyê qanûn û destûra bingehîn ve bikeve garantiyê û hat diyarkirin ku Tirkiye bi Destûra Bingehîn a 12’ê Rezberê tê rêvebirin. Di encamnameyê de hat gotin ku divê ji bo her kes beşdarî pêvajoya demokratîk bibe efûyeke giştî bê îlankirin û hin daxwazên wisa ji  YE û DYA hatin kirin: "Pêwîst e YE û DYA bi rengekî zelal piştgiriya xwe ya ji bo pêvajoya çareseriyê diyar bike û ji bo muzakere encam bigirin pêwîst e PKK ji lîsteya ‘rêxistinên terorê’ bê derxistin."

Hat destnîşankirin ku têkoşîna PKK’ê ya li hember êrîşên çeteyên DAIŞ’ê, derxistiye holê ku divê li tevayî Ewropa dest ji polîtîkayên krîmînalîzekirina kurdan bê berdan.

MELEYA KOBANÎ

Di encamnameyê de Kobanî wekî sernaveke cuda hat destgirtin. Hat ragihandin ku pergala xweseriya demokratîk a li Rojava ava bûye ji bo Rojhilata Navîn alternatîfeke rast e û wiha hat gotin: “Ji pergala netewe dewletê wêdetir, pergaleke ku her beşên civakê temsîl dike hatiye avakirin.” Encamnameyê bal kişand ser rola jinan a di şoreşa Rojava de jî.    

Di encamnameyê de hat diyarkirin ku Kobanî ji 15’ê rezberê ve li dijî çeteyên DAIŞ’ê li ber xwe dide û di encama têkoşîna PKK’ê ya li hember DAIŞ’ê li Şengal û Kobanî tenê jiyana bi deh hezaran mirovan nehatiye rizgarkirin, pêşveçûna çeteyên DAIŞ’ê jî hatiye rawestandin.

Di encamnameya konferansê de hat diyarkirin ku berxwedana Kobanî û bi taybet berxwedana jinan ji bo cîhanê çavkaniya îlhamê ye û wiha hat gotin, “Piştevaniya bi gelê Kobanî re nehat qutkirin, li tevayî cîhanê belav dibe. Kurdên li Kobanî dizanin ku ne bi tenê ne. Lê belê pêwîstiya wan bi naskirina polîtîk û piştgiriyê heye.”

Konferansê da xuyakirin ku pêwîst e ambargoya li ser Rojava bê rakirin û alîkariya însanî bê kirin. Hat destnîşan kirin ku divê ji bo kampên êzîdî jî lê dijîn alîkarî bên kirin.

‘PÊWÎST E YE ALÎKARIYÊ BIDE KOMELEYÊN LI KOBANÎ’

Di encamnameya konferansê de hat diyarkirin ku pêwîst e YE bilez alîkariyê bide komeleyên li bajar û kantona Kobanî û wiha hat gotin, “Em dixwazin 5 endamên daîmî yên Konseya Ewlekariyê ya NY tedbîran bigirin. Divê ji bo Kobanî bilez ji aliyê Tirkiyeyê ve korîdorek bê vekirin û pêdiviyên însanî û tenduristiyê werin bicihanîn.

‘BILA 1’Ê SERMAWEZÊ BIBE ROJA CÎHANÊ YA KOBANÎ’

Di encamnameyê de girîngiya ku pêwîst  e pergala kantonan a li Rojava bilez ji aliyê Sûriyeyê ve û li gor daxwaza gelên li van kantonan dijîn bê qebûlkirin, pêkanîna pêşniyara çareseriyê ya hejmar 2170 ya ji bo li hember DAIŞ’ê tedbîr bên girtin ji aliyê Konseya Ewlekariyê ya NY ve hat qebûlkirin bişopîne.

Hat diyarkirin ku bi vî awayî wê li hember êrîşên çeteyên DAIŞ ên di sînorî Tirkiye-Sûriyeyê re li hember Kobanî bên astengkirin.

Beşdarên konferansê, ji civaka navneteweyî xwest ku 1’ê Sermawezê wekî “Roja Cîhanê ya Kobanî” bê qebûlkirin.